الحبيس: يمكن يللي عم اعملوا هلّق خطيّه, بس هالخطيّه بتقربني

فشخة ع درب السّما.

الحبيس : وحياتك يمّي, لمّن منتلاقا بالسّما انا اللي بدّي غسّلّك

اجريكي بدموع عينيّي.

أمو:افتحلي انته ومغمّض عينيك. افتحلي انته ودايرلي ضهرك.

طلّ من الباب نتفه, وحيات جروحات يسوع, بتطلّع بخيالك ع الأرض

وما بعلّي عيوني صوبك.

الحبيس: حرام تنفتح خوابي النبيد قبل وقتا يمّي ليش انتي بترضي

ازا فتحت باب المحبسه هلّق ارجع بلّش من جديد؟

ويمكن كون قطعت نصّ الدّرب يمّي.

أمو:أنا برمت وجّي صوب بقاع كفرا, ازكرني بصلاتك يا بونا شربل.

والمرا ما نسيتك هون, لا تنسيا فوق.

الحبيس: وانا برمت وجّي صوب المدبح ورح بلّش القدّاس عن نيّتك

تا توصلي بخير عالبيت.

أمو:اغفرلي خطايايي من ورا الباب. انا مشيت.

الحبيس: قوليلي قبل ما تبعدي انّك مش زعلاني, تا فوت ع السّما

والضّحكه عا وجّي.

أمو: لا تشغّل بالك يا ابني, اعتبر اللي صار هلّق بصر بنام, انته وضحكتك,

وانا لاحقتك حفا ع السّما. قديّش رح بتكون السّما أبعد من المحبسه

.

__________________