لاني بطبعي قليل الرباية
و بمشي بشد الودان و العصاية
اسمحلي جنابك سيادة الرئيس
اتمرمغ في كرمك براحتي و اهيص
و احجز في سجن الغلابة سويت
شبعت كباب وحشني الصميت باكل و بنكر مقولتش كفاية
لاني بطبعي قليل الرباية
استاذن سعادتك ف اثنين جنية
هافطر عيالي سيمون فيمية
يا ريس في عهدك شبعنا فلوس
أخذنا السعادة في هيئة لبوس
ضميري حايشني اطاطي ليك
دعتلك زمان ف هادعي عليك
لابس قميص أو لابس عباية
لاني بطبعي قليل الرباية
اسمحلي يا ريس اكسر قانونك
قانون الجماعة لا يسري بدونك
شبعنا شقاوة في حوش العبيد
وشوشنا باشت في دم الشهيد
شكيت للي جابني و جابك رئيس
في دعوة ولية في ليلة خميس
ملقيتش فايدة فرشت الملاية
لاني بطبعي قليل الرباية
في عهدك يا ريس اتساوى الجميع
عدلك يا باشا فوق الفظيع
ساوي التعري رجالة بحريم
يا خوفي يا ريس و حكم اللئيم
مش باقي في جسم الغلابة الا صوت
ولا باقي في ماتش الرياسة الا شوط
هارفع سعادتك فوق كارت احمر
لون دم غرق أيدين شاب اسمر
و بكرة يغرق رخام السرايا
دة جيل عضمة ناشف قليل الرباية
يا فرحة ما تمت خذها الغراب
زرعنا إنتخابك حصدنا الخراب
جماعتك يا باشا خلاص ضيعوك
و كل اللي جابك بيلعن ابوك
يا ريس تشجع وواجة حقيقتك
لأمته تنافق و بتداري خيبتك
يا فاشل بدرجة معالي الرئيس
يا مغرق بلادك في قعر الهويس
سامح بجاحتي في سرد الحكاية
لاني بطبعي قليل الرباية
مما راق لى
عمـــــــــــــــده