ازاي تخلي الفلوس تحب؟

موضوع ساخر بس كتير عجبني وفلا بيحكي اشياء واقعيه في مجتمعنا العربي
شوفوه معي
بتحب الفلوس؟ بسألك بتحب الفلوس؟ طبعا لن تجيب لأنه سؤال عبيط جدا لأننا جميعا نحب الفلوس! ولكن هل تعرف كيف تحصل عليها؟. سيرد واحد لابس نضارة وبيقرا الأهرام كل يوم وبيسمع علي الحجار ومحمد ثروت ويقوللي طبعا بالعمل الجاد والعزيمة والإصرار والتدبير يصل الإنسان إلى المجد والمال.. أحب أقول لصديقنا الكلاسيكي لا يا مان ده كان زمان. كبيرك بعد 30 سنة شرف وكفاح إنك يبقي معاك 100 ألف جنيه تجيب بيهم مدفن محترم تندفن فيه. دعك من قصة الكفاح والجد والاجتهاد الكلام ده ميعدتشي ييجي منه
دلوقتي لازم تفتح دماغك علشان تاكل ملبن .. وكل واحد حسب ظروفه.
يعني لو اللي بتقرا الكلام ده بنت روشة وجميلة من سن 19 إلى 28 أقول لها صديقتي طريقك مفروش بالورود والدولارات والريالات .. مشوار صغير إلى أي شركة إنتاج ميلودي أو روتانا أو أي شركة تانية وتعملي أغنية وكليب من إياهم .. اسمك هيسمع وتعملي كام ألبوم وتيجي في كم مجلة وتكسبي ذهب من الحفلات في مصر ودول الخليج .. وبعدين شيخ من إخواننا بتوع النفط هيصعب عليه إن قمر زيك يمشي في طريق الضياع فهيتجوزك علشان تتوبي وطبعا هيطلقك كمان شوية بس مش مشكلة هتطلعي ليك من العملية دي بحاجة كده حوالي 3 أو 4 مليون جنيه.. وحشين؟ ..

أما لو كان اللي بيقرا الكلام ده شاب صغير 16 أو 17 سنة ومطحون في المذاكرة وخايف أنه ميقدرشي يجيب مجموع كبير يدخل كلية كويسة فأنصحه بسرعة إنه ميذاكرشي ويجري على أي نادي يتعلم لعب الكرة والوقت اللي هيضيعه في الفاضي في المذاكرة والكلام اللي ميجيبشي همه ده يقضيه في لعب الكرة وبدل ما يكسب ملاليم هيبقي نجم مشهور ومعاه ملايين وبدل ما يجري ورا واحدة مسلوعة عايشة في المناطق الشعبية هتجري وراه مزز المعادي ومصر الجديدة ومش بعيد الفنانات والمغنيات ..

أما لو كان اللي بيقرا الكلام ده صحفي من اللي طالع عينهم بيصرخ في البرية يمكن الناس تفوق فأقوله وأمثاله الوصفه غير كده خالص .. إما تهاجم رجال أعمال مشهورين أو تدافع عنهم وفي النهاية هتجيب إعلانات وتاخد نسبتك وتشوف الموجه ماشية مع مين وتركبها أو تشتغل مندوب إعلامي لفنان مشهور وأهي سبوبة مش بطاله تهاجم اللي يهاجموه وتدافع عنه. أما لو كت مدرس فهدي أعصابك خالص .. العيال بيقرفوك طيب .. ما يقرفوك مش أحسن ما تضرب واحد منهم ضربة وتروح ورا الشمس .. لا.. إنت زبط العيال .. صاحبهم وارسم نفسك إنك مدرس عبقري جيب لهم مسائل صعبة .. حببهم فيك .. خلي لسانك حلو كده يتلم حواليك العيال .. تدي دروس خصوصية وترفع في السعر زي ما انت عاوز .. وتقول لهم بالحجز .. ومعلشي آسف معنديش أماكن دلوقتي شوية نصب يعني هتلاقي العملية تبقي معاك حلاوة ..

أما بقى لو كان اللي بيقرا الكلام ده صيدلي فأقوله يا مان إنت بتاع الكيميا عندك الجدول جيبه واتصرف فيه بس أوعى تبقى غبي وتبيعه في صيدليتك وسمعتك تبقى على كل لسان وبعدين تدخل السجن ويجيبوك وراء الأسوار .. تقول الجريمة لا تفيد لا يا مان إنت تجيب الجدول وتسربه من برة برة وخلال سنة وإلا اتنين هتشتري عربية وتتجوز وتفتح كمان صيدلية.

أما بقى لو دكتور فياريت تتخصص نساء وتعملك علاقات مع بنات الجامعات ويا ريت الجامعات الخاصة .. طبعا إنت عارف هتعمل إيه؟ عملية الإجهاض بكام النهاردة؟ وانت وشطارتك بس بالراحة يا دكترة من غير ما حد ياخد باله .. وياريت تتعامل مع الطبقة الراقية .. شغلهم كتير ومش هيبقى فيه شوشرة .. أما بقى لو اخترت تخصص تاني فسيبك من الحكومة وقرفها .. مستشفيات خاصة وعيش وخلي الشعب يعيش.

يسلمو ع هيدا الموضوع