مدونة قصص دينا عماد

ليست عذراء...لدينا عماد

الحلقة 1




صوت جرس الباب بيرن
مايا بتفتح عينيها على الصوت... بتقوم من ع السرير... سامعة
صوت باباها وجدتها بره... بتقوم تقف قدام المراية... تبص بحزن
على جمالها وملامحها الاوروبية عيونها الزرقا وبشرتها البيضا
وشعرها الاشقر... بتقرب من المراية وبتلاحظ الهالات السودا
تحت عينيها وبتلمسها
باب الاوضة بيخبط... بيتفتح الباب
"العروسة صحيت ولا لسه"
بتقرب منها نسرين "حامل فى الشهور الاخيرة" وبتسلم عليها
بتفرح مايا لما تشوفها...فرحة مكسورة... بيحضنوا بعض
"حمدالله ع السلامة يانسرين...كده متجيش من بدرى"
"معلش يامايا.. ممدوح معرفش ياخد اجازة الا يومين بس"
"يعنى مش هتقعدى معايا شوية"
"معاكى فين يابنتى... ده انتى كلها كام ساعة وفارس هياخدك
على عش الحب وطير ياحماااام"
نسرين بتضحك وهى بتغنى... مايا بتحاول تبتسم ... متقدرش ..
.تلاحظها نسرين
"مالك يامايا"
"متضايقة... خايفة... مش عارفة"
"معلش مش هتخافى اكتر منى..ده انا يوم الفرح كنت مرعوبة
بس بدل بتحبى عريسك وهو بيحبك متخافيش من اى حاجة"
مايا بتسكت مبتردش... بتبص لها نسرين
"ايه ده يامايا...وشك باي عليه الاجهاد...انتى مش نايمة كويس؟"
"بقالى بتاع اسبوع مبنمش... لو عرفت انام ساعتين يبقى من الله"
بيرن موبايل مايا ع السرير... بتمسكه نسرين...وترد
"الو... لا مش حبيبتك ...جيت من ساعة بس... وانت كمان واحشنى يافارس...
الف مبروك ربنا يتمم بخير...خلى بالك من مايا انا بقولك اهو...انا عند نينة تحت...
اه طبعا هطلع اسلم على خالتى... ممدوح وصلنى وخرج شوية...مايا معاك اهى"
بتناول مايا التليفون... مايا بتاخده
"انا يدوب سلمت على ماما ونزلت لك... هطلع اسلم على
خالتى علشان متزعلش..لما تخلصى وتفطرى وتفوقى
رنى عليا انزلك"
"هتيجى معايا الكوافير مش كده...متسيبينيش يا نسرين
النهاردة بالذات"
"حاضر ياحبيبتى...جاية معاكى طبعا"
اخدت مايا التليفون...وخرجت نسرين من الاوضة
"الو"
"صباح الخير ياحبيبتى"
"صباح النور"
"انا رايح الشقة اودى أكل...عايزانى اخد حاجة وانا رايح"
"لا...فارس انا عايزة اتكلم معاك"
"خير؟"
"موضوع مهم...ينفع تنزلى نتكلم"
"طيب حاضر... هلبس وانزلك"




فارس قفل مع مايا وكمل لبسه...خرج من الاوضة
راح لباباه اللى كان قاعد يقرا الجورنال
"صباح الخير يابابا"
"صباح النور يا عريس...مبروك يابنى"
جت حياة من المطبخ
"الاكل اللى هتشتريه يا فارس اوعى تسيبه بره التلاجة...
الجبن ع الرف واللحوم ف الفريزر"
فارس"حاضر ياماما"
توفيق بيطلع فلوس من جيب الجلابية
"خد يافارس"
فارس"شكرا يابابا ...معايا الحمدلله"
توفيق"ما انا عارف ربنا يزيدك...بس دى هدية جوازك"
حياة"خد من ابوك يا فارس... ربنا يسعدكم يابنى"
توفيق"اعمليلى كوباية شاى ياحياة"
حياة"حاضر"
توفيق بيميل على فارس
"عايز اقولك كلمتين مهمين"
"اتفضل يابابا"
"انا عارف انك بتحب عروستك... بس اوعى الحب ده يخليك
ضعيف قصادها... اوعى تسمح لها انها تمشى كلمتها
عليك ولا تتدلع بجمالها ... لازم تدبح لها القطة من اول يوم..
. اول يوم ده اللى هيريحك العمر كله او يتعبك العمر كله...
ياهتكون انت الراجل ياهتكون هى الراجل... وانت راجل من
ضهر راجل ولا ايه؟"
"طبعا يا بابا ...بس مايا عارفاى كويس وعارفة طبعى وهى هادية ...
انا متاكد انها هتكون زوجة مطيعة"
"ربنا يسعدكم يابنى"
دخلت حياة بالشاى...ف نفس اللحظة اللى رن فيها جرس الباب
فارس بيقوم يفتح
"دى اكيد نسرين...كانت عند نينة تحت وقالت هتطلع لنا"
بيفتح الباب لنسرين...بتسلم عليه
"ازيك ياعريس... ازيك ياخالتى...ازيك يا عمو"




فؤاد قاعد مع مامته ع الفطار... تخرج لهم مايا وتقعد معاهم
"صباح الخير يابابا...صباح الخير يا نينة"
بيردوا عليها التحية
الجدة"انتى نمتى امتى... ده انتى كتى صاحية ساعة الفجر"
مايا"نمت من شوية كده"
فؤاد"ليه كده السهر ده"
مايا"غصب عنى مبيجيليش نوم"
الجدة"طب كلى لقمة علشان انتى طول اليوم هتبقى ف الكوافير"
مايا"حاضر"
بيرن جرس الباب...بتقوم مايا تجرى
"ده اكيد فارس"


بتفتح الباب... فارس بيدخل
"صباح الخير يا نينة...صباح الخير يا خالى"
فؤاد"اهلا يافارس...تعالى كنت عايزك"
مايا بتشد فارس قبل ما يدخل
"انا عايزة اتكلم معاك"
فارس"هشوف خالى الاول واقعد معاكى"
فؤاد "فطرت يافارس"
فارس"اه الحمدلله"
يقوم فؤاد من ع الفطار
"طب تعالى ف الصالون هنتكلم شوية "


دخل فؤاد الصالون وراح فارس وراه
مايا رايحة وراهم...نادت عليها جدتها
"تعالى يا مايا افطرى"
"لا شبعانة يا نينة...شكرا"
جرس الباب بيرن...بتروح مايا تفتح
"صباح الخير يا مايا"
"صباح النور ياعمتو"
"نسرين نزلت ولا لسه عند حياة"
"اكيد عند عمتو حياة"


دخلت ايمان لمامتها المطبخ..ووراها مايا
ايمان"صباح الخير ياماما"
الجدة"صباح النور...جيتى ف وقتك"
ايمان"متقلقيش انا قلتلك هاجى اطبخ معاكى اكل العروسة... قوليلى يا عروسة اعملك ايه جنب الفراخ"
مايا وهى بتخرج م المطبخ
"اى حاجة"



فارس مع فؤاد
فؤاد"انت عارف يافارس ان انت ابنى وان مامتك وباباك ربوا مايا اكتر ما انا ربيتها"
فارس"طبعا ياخالى"
فؤاد"وانت لما خطبتها وهى وافقت انا متكلمتش ف اى حاجة"
فارس"حصل"
فؤاد"بس النهاردة كتب الكتاب ولازم هيكون فيه اجراءات نتكلم
فيها ومش هنتكلم فيه قدام الناس"
فارس"تقصد يعنى المؤخر وكده...اللى تؤمر بيه"
فؤاد"هنعمل قايمة زى ما عملنا لنسرين ونكتب فيها اللى
ف الشقة ومؤخر 50 الف جنيه"
فارس"حاضر ياخالى... اى اوامر تانية"
فؤاد"خلى بالك من مايا... انت هتبقى كل حاجة ليها"
فارس"مايا ف عنيا"
رن موبايل فارس...رد
"الو... ايوه يا احمد...حاضر انا نازل اهو"
كمل كلامه وهو خارج وكانت مايا مستنياه قريب من الباب
"رايح فين"
"احمد صاحبى مستنيى تحت...ورايا مشاوير كتير اوى يامايا"
"عايزة اتكلم معاك"
"بالليل ياحبيبتى... هنبقى مع بعض وهنتكلم براحتنا...انتى نازلة امتى"
"الساعة 1"
بص فارس ف الساعة
"نسرين رايحة معاكى"
"اه نسرين وعمتو ايمان...هى مامتك مش جاية معانا ليه"
"بابا قالها تروح ع القاعة احسن...يالا سلام"
نزل فارس ومايا واقفة ف مكانها سرحانة




مايا قاعدة عند الكوافير... خلصت كل حاجة
كل اللى داخل او خارج ينبهر بجمالها
والمثير للانتباه... ان كل اللى يشوفها يقول
"عروسة اجنبية محجبة"
حتى الكوافيرة نفسها لولا انها اتكلمت معاها وعارفاها كانت
شكت انها اجنبية
مايا ملاحظة نظرات الاعجاب ف عيون كل الناس
بس اللى شاغلها الحزن اللى جواها وانها مش قادرة تفرح
بتقرب منها نسرين
"ايه يا مايا... شكلك زى اللى بتتجوز غصب عنها"
مايا بتحاول تبتسم...بتكمل نسرين كلامها
"اضحكى ومتفكريش كتير... هتطلعى مكشرة ف الفيديو"
تدخل لهم ايمان
"يالا يا مايا...فارس وصل"




مايا قاعدة على الكوشة... اثناء كتب الكتاب
فارس قاعد مع فؤاد مع المأذون
صوت كتب الكتاب فى الميكرفون بيملا القاعة
كل كلمة بتتقال بتسمعها مايا بتجرح قلبها
خلص كتب الكتاب...سمعت الزغاريط
نزلت منها دمعة غصب عنها
لمحتها ايمان وهى بتمسح دموعها هى كمان
نظرات ايمان ومايا اتلاقت بدموعهم
كل واحدة فيهم اتجاهلت ان التانية شافتها
ومسحت دموعها وحاولت تبتسم



فارس ومايا داخلين شقتهم...ومعاهم حياة وتوفيق
وايمان وفؤاد وجدتهم
دخلت الجدة مع مايا اوضتها
"مبروك يا مايا... انا وباباكى هنجيلك الضهر نطمن عليكى... ابوكى
عاش بره صحيح بس لسه دماغه وتفكيره ماشية على عاداتنا
القديمة ... وزى ما حصل مع بنت عمتك لازم يحصل معاكى"
طلعت لها منديل ابيض
"خدى ده... وبكرة هنيجى ناخده علشان ابوكى وحماكى يشوفوه"
قامت الجدة خرجت من الاوضة


سلمت على فارس وباسته
"مبروك ياحبيبى...خلى بالك منها"
توفيق بيسلم عليه وبيوشوشه
"زى ما قلتلك... لازم تبقى راجل من اول يوم ومتنخش ...
يالا شد حيلك وهنيجى بكرة نطمن عليكم"
خرجوا كلهم وقفل فارس الباب وراهم ودخل اوضته



فارس داخل الاوضة لمايا...قعد جنبها على طرف السرير
"مبروك يا حبيبتى"
قرب منها يبوسها...بعدت عنه بحركة مفاجئة
"مالك"
"مفيش متوترة شوية بس"
قامت مايا وقفت قدام المراية وهى بتفك الطرحة
قرب منها فارس وحضنها...بعدت
"فارس عايزة اتكلم معاك شوية"
"هنتكلم وهنقول كل حاجة بس بعدين"
وافتكر فارس كلام باباه واتنرفز عليها
"فى ايه...كل ما اقرب منك هتبعدى وتقولى تكلم...هو الكلام هيطير"
مايا بخوف
"بتزعق ليه... متخوفنيش منك"
حس بيها خافت فعلا
"متزعليش يا مايا... بس محبكتش كلام دلوقتى... متخافيش"
حضنها فارس بحب وحنان... واستسلمت ليه بهدوء



فارس بيفتح نور الاباجورة وهو قاعد على السرير
بيبص لمايا... مايا بتبعد عينيها عنه... وبتقوم من تحت الغطا
فارس بيشيل الغطا من عليه يرميه على الارض
مايا بتلبس الروب... فارس بيبص على الملاية البيضا المفروشة
ع السرير
قام...مايا جاية تخرج م الاوضة...شدها من دراعها
"ايه ده؟؟؟ ازاى يعنى"
مايا وهى بتترعش وبتحاول تلاقى مبرر
"بتحصل"
"بتحصل ازاى... هو انا اهبل هتضحكى عليا"
عيطت مايا بخوف وقعدت على السرير وهى مرعوبة
"انت مش بتحبنى... افهمنى"
وبكل غضب وثورة...ضربها بالقلم
"افهم ايه.... افهم انك ضحكتى عليا... كنتى بتمثلى علينا الادب
والاخلاق وانتى صايعة وماشية على حل شعرك"
مايا بتعيط
"متقولش عليا كده...انت عارفنى كويس"
"انا ليا اللى عرفته النهاردة"
مسكها من دراعها وهو بيهزها بقوة
"مين اللى عمل كده... قولى ... وامتى ؟؟ وليه ضحكتى عليا"
"سامحنى واسترنى يا فارس ... انا مهونش عليك تفضحنى
مش كده؟"
"استر ايه؟؟؟ واللى جايين بكرة دول اقولهم ايه"
مايا بتحاول تستعطفه
"ارجوك يا فارس... استرنى ده انا مراتك حبيبتك"
ولما قالت كده...كأنها غاظته اكتر
هجم عليها وفضل يضرب فيها
"عملتى فينا كده ليه... فيا وف ابوكى وف كل اللى وثقوا فيكى"

ايام عمرى

روووووووووووعه

استمرى يلا

الحقينا بالحلقه التانيه

يسلمووووو ايدك حبيبتى

مرورك الاروع يا شهد اكيد

واكيد اليوم هتنزل الحلقة الثانية

تكرمي يا قمر

ليست عذراء... الحلقة 2

مايا على السرير... من كتر الضرب بدأت تفقد قدرتها ع الصراخ
قلق فارس... بعد عنها بعد ما شاف الدم بينزف من شفتها
"قومى اغسلى وشك"
مايا موجوعة... ألم نفسى وألم جسدى
حاولت تقوم مش قادرة... فضلت مكانها
صرخ فيها
"بقولك قومى اغسلى وشك ده من الدم اللى عليه"
قامت وهى بتجر نفسها من الألام اللى فيها

قعد فارس على طرف السرير يبص عليها
احساس بالذنب ناحيتها... واحساس بالاشمئزاز منها
صراع داخلى بين احاسيسه المتناقضة مش عارف يميل لاى احساس فيهم
جت مايا من الحمام بعد ما غسلت وشها
وماسكة منديل بتكتم بيه الدم على شفتها اللى اتفتحت من الضرب
قام فارس وقف.... قعدت مايا على السرير وهى بتعيط
صرخ فيها



"مين اللى عمل كده؟؟ حمزة مش كده"
بصت له باستنكار...استفزه
"ايه؟؟؟ مش حمزة... حد وانتى مسافرة؟؟؟ خونتينى واحنا مخطوبين؟؟ انطقى عملتى فينا كده ... انا مصدوم فيكى"
ونطقت بلسان تقيل من ألمها
"انا اللى اتصدمت فيك... انت واحد تانى غير فارس اللى اعرفه"
وصرخ فيها اكتر وهو بيهم يضربها...خبت وشها بايديها
"كنتى عايزانى اقولك ولا يهمك... عادى يا حبيبتى نزوة وخلاص واخص عليه اللى سابك... احمدى ربنا انى مموتكيش"
"وانت فاكر كده مموتنيش وموت كل احساس جوايا ناحيتك"
"ليكى عين تتكلمى كمان... ماهو صحيح بعد اللى عملتيه ده مش بعيد يطلع منك اى حاجة"
مددت على السرير تنام بوجعها النفسى والجسدى
"انتى هتنامى... قومى قوليلى غلطتى مع مين"
ردت وهى بتشد عليها الغطا
"مبقتش تفرق"

مايا نايمة صاحية...دموعها نازلة بصمت
فارس نايم صاحى...الالم بيعتصر قلبه
كل واحد فيهم ضهره للتانى
فارس بيتكلم ف سره
"ليه تعملى فيا كده... ليه فاجئتينى خلتينى مقدرتش اتحكم ف اعصابى"
مايا بتكلم نفسها ف سرها
"كان نفسى تسمعنى الاول قبل ما تحكم عليا... كان نفسى تسامحنى ونبدأ مع بعض صفحة جديدة زى ما كنت بتوعدنا
فارس بيكمل كلام ف سره
"كنت بحلم ان حياتنا هتبقى احلى حياة ...كنت بفكر ازاى اسعدك واعوضك عن كل حاجة فاتت... صدمتينى وحطمتى كل احلامى"
مايا بتكمل كلامها ف سرها
"كنت كل ما افتكر اللى حصل واخاف... اسمع كلامك واشوف حبك ليا اقول هيسامحنى... يا خسارة حبى ليك

فارس بيكمل كلامه ف سره
"لسه فاكر اول مرة شفتك فيها... ياااه يا مايا... وفاكر كمان نظرة حمزة ليكى"

فلاش باك
فارس وحمزة "8 سنين" ونسرين "5 سنين" بيلعبوا على السلم
باب البيت من تحت مقفول.... يظهر فؤاد قدام الباب
تدخل نسرين تجرى على بيت الجدة
"خالو فؤاد...خالو فؤاد جه يانينة"
تيجى الجدة بمفتاح الباب ... تفتح بلهفة لفؤاد
"حمدالله ع السلامة... ده ايه المفاجئة الحلوة دى"
تفتح الباب... اول ما الباب يتفتح
تظهر مايا "3 سنين" واقفة ف ايد فؤاد
طفلة جميلة بملامح اوروبية

فارس وحمزة واقفين جنب بعض
اتفاجئوا بالطفلة الضيفة
مال فارس على حمزة
"مين دى؟"
كانت عين حمزة مركزة على مايا وبيبتسم لها وهى كمان بتبتسم له
حمزة مسمعش سؤال فارس
دخل فؤاد البيت وهو ماسك مايا ف ايده
نزلت ايمان ع السلم ونسرين وراها
"فؤاد جه بصحيح... حمدالله ع السلامة"
دخل حمزة وفارس ورا فؤاد وايمان وجدتهم
حمزة راح لايمان
"مين دى ياماما"
ايمان"دى مايا بنت خالك"

فؤاد قاعد ف الصالون مع مامته
وايمان وجوزها مصطفى
وحياة وجوزها توفيق
وال3 اطفال واقفي يبصوا للضيفة الغريبة
توفيق"فارس خد اخواتك واطلعوا العبوا بره"
تقرب نسرين من مايا
"تعالى العبى معانا"
مايا بخوف تبعد وترجع لحضن فؤاد
فؤاد"روحى العبى معاهم"
مايا ترفض من غير ما تتكلم وتحضن فؤاد
ايمان"خلاص يا نسرين... اطلعوا انتوا العبوا وسيبوا مايا
يطلع فارس وحمزة ونسرين يكملوا لعب ع السلم

مايا حست بصداع...ومع عدم قدرتها على النوم
قامت تدور على مسكن للصداع
فارس حس بيها وهى قايمة
"رايحة فين؟"
مردتش عليه... قامت تفتح النور
لمحت صورتها ف المراية
بصت لنفسها...اتفاجئت
شفتها وارمة وزرقا
وخدها متعلم عليه خطوط حمرا من الضرب
صعبت عليها نفسها... نزلت دموعها
راحت اخدت المسكن ورجعت مكانها تانى
حاولت تنام... وافتكرت اول يوم ليها ف مصر

فلاش باك
مايا قاعدة ف حضن فؤاد
مستغربة الناس اللى اول مرة تشوفهم
ورغم انها كانت صغيرة... بس فاكرة كويس
كلام كتير بيتقال بلغة مش مفهومة
اطفال موجودين ...وبنت بتكلمها وهى مش فاهماها
كل اللى فاكراه انها فضلت ف حضن باباها اسبوع
بيعلمها الكلمات المهمة واسامى الموجودين
وف اخر الاسبوع سابها وسافر

فارس لما قامت مايا فتحت النور
وشاف وشها... استغرب ازاى قدر يعمل فيها كده
وافتكر انه يوم ما فؤاد جاب ومايا وجه
وباباه قالهم يروحوا يلبعوا
رجع هو وحمزة ونسرين ...وقعدوا جنب الباب من غير ما حد يشوفهم
فلاش باك
فؤاد" انا جبت مايا علشان تعيش هنا على طول"
الجدة"ليه يافؤاد...فين مامتها"
فؤاد"هنتطلق"
توفيق"بصراحة يعنى انت غلطت لما اتجوزت واحدة لا م بلدك ولا م دينك...لأ وخلفت منها كمان"
فؤاد"ايوه كنت غلطان... بس اهو ادينى بلحق الغلط بدرى بدرى"


ايمان"بس حرام يا فؤاد بنت صغيرة زى دى تتحرم من مامتها ف السن ده"
فؤاد"ما انا جايبها وعارف ان هيبقى لها 3 امهات مش ام واحدة... انا عايزها تتربى على عاداتنا واخلاقنا...مش عايز اللى شفته هناك يتكرر"
الجدة"ايه اللى شفته هناك"
فؤاد"واحد صاحبى هناك... بس اكبر منى ومتجوز من زمان ونفس الظروف شبيهه بظروفى... بنته هناك عايشة زى الاجانب مع انها مسلمة بس بالاسم بس وراحت عاشت مع صاحبها ومامتها بتشجعها"
توفيق"استغفر الله العظيم"
مصطفى"ماهى البنت طلعت زى المجتمع اللى عاشت فيه"
فؤاد"علشان كده خفت"
ايمان"ومراتك... سابت البنت ازاى ولا انت جبتها من وراها"
فؤاد"انا وهى بيننا مشاكل كتير فاتفقنا اننا ننفصل وانا اخد البنت"
الجدة"وهى وافقت"


فؤاد"الحمدلله وافقت علشان مش فاضية لها ووراها شغل"
الجدة"ياقلبها"
فؤاد"بس اتفقنا ان مايا تروح لها كل صيف اسبوع ولا اتنين وهى لو عايزة تشوفها تبقى تيجى هنا...المهم ان البنت تعيش وتتعلم هنا"
توفيق"خير ماعملت"
مصطفى"وانت هترجع تستقر هنا؟"
فؤاد"معدش ينفع...انا شغلى وحياتى استقرت هناك... انا لازم ارجع"
الجدة"روح يابنى شوف شغلك ومتقلقش على بنتك... اهى تتربى مع عيال اخواتك"
ايمان"هى بتفهم عربى"
فؤاد"لا ...بس اكيد هتتعلم وسطكم"

قام فارس من ع السرير وهو متضايق
فتح شباك الاوضة ووقف يبص للسما
وهو بيفكر
"اعمل ايه... كلها كام ساعة وهييجوا يسألونى... اهو اللى انت كنت خايف منه ياخالى حصل...بنتك مصانتش شرفك"
بص لها وهى على السرير وضهرها ليه
التفت بعيد عنها وهو مشمئز منها بعد ما افتكر اللى عملته

مايا مش عارفة تنام... حست بفارس وهو قايم من جنبها
متحركتش من مكانها...
"للدرجة دى انا اتخدعت فيك... كان لازم اعرف انك غير حمزة... كان لازم افتكر قسوتك عليا زمان زى ما قسيت عليا دلوقتى"
فلاش باك

مايا ونسرين ماسكين ف ايد بعض
بيشتروا حاجات حلوة من جنب البيت
حمزة وفارس بيلعبوا كورة مع اولاد تانيين
نسرين جريت سبقت على البيت
ولد ف سن فارس... راح لمايا
"انتى اسمك ايه"
"مايا"
"هو انتى ليه لابسة باروكة"
"يعنى ايه باروكة"
"شعر بيحطوه الستات على راسهم"
"لا مش حاطة حاجة...ده شعرى"
"لونه كده ازاى"
مد الولد ايده باستغراب يتأكد ان ده شعر مايا
مسكه بتعجب وانبهار واستكشاف لحاجة اول مرة يشوفها

جه فارس يجرى هو وحمزة عليهم
فارس"انتى سايباه يمسك شعرك ليه"
حمزة للولد"انت بتشدها من شعرها ليه"
الولد"مش بشدها انا بشوفه بس"
مايا مش عارفة ترد على فارس
زعق لها
"متخليش حد يلمسك تانى انتى فاهمة...يالا ع البيت"
زقها ناحية البيت وقعت ع الارض
عيطت وهى واقعة... ومد حمزة ايده يساعدها تقوم من ع الارض
وهو بيزعق لفارس
"وقعتها ليه"
"موقعتهاش انا كنت بقولها تروح ع البيت"
مد حمزة ايده لايد مايا وهو بيزعق لفارس
"هقول لباباك"
جرى حمزة ومايا ف ايده
ووراهم فارس بيلحقهم قبل ما يروحوا لباباه

حياة داخلة اوضتها
توفيق بيخلص صلاة
"تقبل الله"
"منا ومنكم"
قام توفيق... وقعد على كنبة ف الاوضة
وسرح وضحك
"بتضحك على ايه"
"عارفة افتكرت ايه دلوقتى"
"ايه"
"اول خناقة بين فارس ومايا... سبحان الله اللى يشوفهم يومها يقول هيطلعوا ميطيقوش بعض"
"شوف النصيب... اهى بقت مراته...ربنا يهنيهم"
"يومها مع انه كان صغير بس طلع راجل بجد...مش زى حمزة"
جت سيرة حمزة... قطعت الضحكة من على وش حياة
فلاش باك
حمزة ومايا داخلين على توفيق البيت من الباب المفتوح دايما
"عمو... فارس وقع مايا ع الارض"
مايا بتعيط...دخل فارس يجرى
توفيق بيشخط ف فارس
"زعلت بنت خالك ليه"
"سايبة ولد يمسك شعرها...مش عيب كده"
توفيق وهو بيبص لمايا...
"صحيح؟"
حمزة"هى معملتش حاجة... هو يوقعها ع الارض ليه"
توفيق"مينفعش يا حمزة انها تسيب حد يلمسها...جدع يافارس... راجل"

ألف شكر لكـ حبيبتي
قصة في منتهى الروعة
سلمت لنا يداكـ على الجلب المميز
حقا استمتعت بالقراءه
ليس جديد عليك هذا الابداع والجمال
لانه حليفكي دائما
دمتي ودامت روحكـ بخير
لاحرمنا قادمك .
تـحـيـاتـي

مرورك الاروع حبيبتي بلبل

وبتمنى القصة اتابعوها معي للاخير

ويارب تعجبكم

نورتيني حبيبتي

ليست عذراء... الحلقة 3

مايا نامت بعد ما تعبها الارق والالم اللى بتعانيه
فارس نام... ومن التفكير صحا قبل مايا
فارس قاعد بيبص لمايا وهى نايمة
خيالات كتير بتيجى على باله وهو سرحان فى اللى حصل
تفكيره بيصورله ازاى كانت راضية
تفكيره بيصورله ازاى كانت بتتعامل ف الموقف
بيحاول يبعد الافكار عن خياله مش قادر
بدأت الافكار تدور حوالين مين اللى كان معاها
تفكيره المسيطر عليه...حمزة

تفكيره المتواصل..ولما شافها نايمة
هب مرة واحدة.... صحاها بعنف
"انتى نايمة وسايبانى اكل ف نفسى"
صحيت مايا على صوت زعيق فارس
وشده ليها من دراعها لدرجة انها قعدت من قوة شدته
وردت من المفاجأة
"فى ايه"
ثار اكتر
"فيه انك ضحكتى عليا... كنتى بتضحكى علينا كلنا...مع حمزة صح؟؟ هو حمزة...
علشان كده انتى قاعدة عندهم على طول"
عيطت مايا... من خوفها من عصبية فارس... هزها بعنف
"كنتى بتحبيه... انا غلطان انى تناسيت انك كنتى بتحبيه...سلمتى لى نفسك
باسم الحب"
وبمحاولة لرد الوجع
"ايوه كنت بحبه ...وانا غلطانة انى اتجوزتك...ندمانة انى صدقتك واتجوزتك"
ثار اكتر ومحسش بنفسه الا وهو بيضربها اكتر

حياة لابسة وطالعة من اوضتها
"انا نازلة لماما... كمل لبسك وابقى انزل علشان نروح للعرسان"
"طيب...هصلى الضهر وانزل"

حياة داخلة بيت مامتها...شافت فؤاد قاعد
"صباح الخير يا فؤاد"
"صباح النور...هو توفيق مش جاى معانا ولا ايه"
"لا جاى... شوية ونازل...هى ايمان منزلتش"
"لا لسه"
دخلت حياة المطبخ لمامتها...اول ما شافتها
"كل حاجة جاهزة... اعمليلى قهوة لحد ما البس"

خرجت الام من المطبخ ف نفس الوقت اللى دخلت فيه ايمان البيت ومعاها
نسرين وجوزها
ايمان"نسرين جاية تسلم عليكم قبل ما تمشى"
الجدة"انتى لحقتى ...مش لسه جاية امبارح....ماتقعدى معانا كام يوم"
نسرين"معلش يانينة علشان شغل ممدوح"
الجدة"ما تسيبها ياممدوح كام يوم"
ممدوح"يرضيكى يعنى انها تسيبنى... اهون عليكى"
الجدة"لا يا بنى ربنا مايحرمكم من بعض"
نسرين"خالتو هنا...روحت لها عمو توفيق قال انها هنا"

حياة خارجة من المطبخ بالقهوة
"بسرعة كده يا نسرين...مش جاية معانا لفارس"
سلمت نسرين على حياة
"معلش ياخالتو...لسه قدامنا سفر"
حياة"تروحوا بالسلامة...انتى ف الكام على خير"
نسرين"السابع"
حياة"هانت ربنا يكملك على خير"
سلمت نسرين على كل الموجودين... وسلم ممدوح عليهم وخرجوا

مايا بتعيط ف الاوضة... من الضرب
قفلت الاوضة عليها بعد ما فارس خرج منها
فارس قاعد بره وحاسس بالاضطراب
الوقت بيمر ومش عارف هيتصرف ازاى
جرس الباب رن... حس ان مفيش مفر من مواجهه الموقف
قام وفتح الباب وهو بيحاول يبتسم
جدته كانت متقدمة وجنبها فؤاد ماسكها ف ايده
ووراهم توفيق ووراه ايمان وحياة
سلموا عليه ودخلوا قعدوا وعلامات السعادة على وشهم
فؤاد"هى مايا نايمة ولا ايه"
ارتبك فارس وتمتم بكلام مش مفهوم
فسروه الموجودين على انه احراج
الجدة"لو نايمة صحيها علشان ندخل لها"

دخل فارس الاوضة
اول ما شاف مايا
"عايزينك"
وقف وضهره ليها وكأنه بيكلم نفسه
"انا مش عارف اتصرف...مش قادر اسكت واعيش معاكى وانا كل ما اشوفك
الدم يغلى ف عروقى...مش طايقك ولا طايق نفَسك معايا ف حتة واحدة...
ومش عارف اصدمهم واقولهم الحقيقة... ياريتك كنتى موتى ولا غورتى ف 60
داهية قبل ما اتحط ف الموقف ده"
مايا مبتردش من خوفها منه
كمل كلامه باستسلام
"خلاص معدش ييجى منه وانتى اللى عملتى ف نفسك وفينا كده"

خرج فارس م الاوضة... وبعبوس
"ادخلوا لها"
بصوا الستات لبعض على طريقته...وقام
الجدة ووراها ايمان وحياة داخلين الاوضة
مايا قاعدة مكانها ع السرير منكمشة
اتخضوا من شكلها
صرخت ايمان وراحت على باب الاوضة
"فااااااااااارس... ايه اللى عمل فيها كده"
سمع فؤاد صوت ايمان المفزوع...جرى على الاوضة
توفيق بيبص ل فارس
"ف ايه؟؟؟"
فؤاد لما دخل وشاف مايا وهى بتعيط
وبيسألوها ايه اللى حصل مبتردش
وايمان قاعدة جنبها اخداها ف حضنها

شك فؤاد ... وف نفس الوقت رافض يصدق
نادى بصوت عالى على فارس
توفيق لما سأل فارس وشاف دموعه ف عينيه
شك ان يكون فارس عنده مشكلة
قام متحفز وهو مستاء من ان مايا اتكلمت وحكت بسرعة كده
توفيق داخل الاوضة...ووراه فارس منكس راسه
ايمان قاعدة على السرير ومايا بتعيط ف حضنها
حياة وفؤاد ومامتهم مستنيين من فارس ييجى يقول سبب الاثار اللى على
وشها دى ايه؟؟
فؤاد شك فى فارس... وانه يكون سادى
فؤاد بشك"ايه اللى حصل وايه الاثار اللى على وشها دى"
فارس بيحاول الهدوء
"مسألتهاش ليه؟"
بص لها فؤاد
"ايه اللى ف وشك ده"
مايا بتتمسك بحضن ايمان اكتر وتعيط
توفيق حس ان المشكلة مش ف ابنه....شخط ف مايا
"ما تتكلمى...فى ايه"
فؤاد لفارس
"فى ايه يافارس..انا بسألك انت"
فارس
"فيه ان مايا فضحتك وفضحتنى... بنتك مش بنت بنوت يا خالى"

كلام فارس كان صدمة لكل الموجودين
الجدة دبت ف صدرها...وحياة كتمت صرختها
ايمان بصت لمايا بتساؤل
فؤاد الكلام كان صدمة ليه... واول ما سمعه
التفت لمايا وهجم عليها يضربها بعنف اكبر
ايمان بتصرخ وبتحوش عنها وبتتضرب ف النص
الجدة بتعيط وتشد فؤاد... حياة واقفة دموعها نازلة بصمت
ايمان بتصرخ"كفاية يافؤاد... كفاية هتموت ف ايدك"
توفيق بيزعق لايمان
"سيبيه يموتها بدل العار اللى جابته لجوزها"
ايمان"بالراحة عليها ...هى لو بنتك كنت قلت كده"
فؤاد"مين ؟؟؟غلطتى مع مين؟؟ومن امتى؟...اتكلمى"
ايمان وهى بتبص لمايا
"مايا...مايا...كفاية يا فؤاد البت هتموت"
توفيق"انتى الوحيدة اللى بتدافعى عنها... علشان تدارى على غلطتها مع ابنك..
.مفيش غير حمزة هو اللى عمل كده"
والتفت فؤاد وحياة والجدة لايمان...بنظرات الاتهام
ايمان بتعيط
"متجيبش سيرة ابنى... ابنى ميعملش كده ابدا... اتكلمى يامايا وقولى
انه مش حمزة"
مايا فاقدة الوعى ف ايد ايمان
ايمان برعب "مايا...مايا...كلمينى"
توفيق"ف ستين داهية"
فؤاد بقلق بيهز مايا "مايا...مايا"

توفيق وحياة وفارس وفؤاد قاعدين ساكتين محدش بيتكلم
يتفتح باب الاوضة...يخرج الدكتور والجدة بتوصله
يقوم فؤاد"مالها يادكتور"
الدكتور"مالها ايه...مين اللى عمل فيها كل ده حرام عليكم"
فؤاد"لو سمحت يادكتور عرفنا حالتها"
الدكتور"حالتها انها اتعرضت لضرب وحشى واثاره مش محتاجة كشف...
وشها كله كدمات...بس مش دى بس المشكلة"
فؤاد"ايه تانى"
الدكتور"اللى حصل لها عملها صدمة عصبية وفقدت النطق... محدش يضغط
عليها انها تتكلم... وياريت تستشيروا طبيب نفسى يتابع حالتها"
فؤاد وهو بيوصله للباب...وبيحاسبه
الدكتور"لو اللى ضربها جوزها وعايزين تقرير طبى انا ممكن اعملكم التقرير...
الضرب كان عنيف جدا وواضح انه اكتر من مرة"
فؤاد"لا شكرا يادكتور.. هتتحل ان شاءالله"

كلهم قاعدين ف صمت ماعدا ايمان مخرجتش من الاوضة
قطع الصمت صوت توفيق
"وبعدين... الحل ايه"
فؤاد بيبص لفارس مستنى رده...وعينيه كلها رجاء
فارس"مايا طالق... مش هقدر تعيش معاها بعد ما خدعتنى"
توفيق"هو ده الصح... مينفعش تستر على غلطة ملكش دعوة بيها"
فؤاد"للدرجة دى يافارس هانت عليك... احنا منعرفش ايه اللى حصل"
فارس"اللى حصل انها فرطت ف نفسها... انا اللى كنت فاكرك هتموتها الاقيك
بتتكلم بالضعف ده"
فؤاد بيعيط"منكرش ان غلطتها كبيرة اوى...بس لما حسيت انها هتموت
خفت عليها"
توفيق باستهجان"خفت"
فؤاد"ايوه خفت...دى بنتى الوحيدة برضه"

ايمان جنب مايا... بتطبطب عليها وبتعيط
"صحيح حمزة هو السبب؟؟؟ وليه مقلتليش"
مايا بتعيط بحرقة... مش قادرة تتكلم
اتفتح باب الاوضة...ودخلت الجدة
"لبسيها يا ايمان"
ايمان"ليه؟"
الجدة"فارس طلقها خلاص... وهترجع معانا"
مايا بتعيط بحرقة اكبر... جدتها مش عارفة تتعاطف معاها ولا تقسى عليها...
خرجت من الاوضة وهى محتارة

فؤاد بيقف بالتاكسى قدام باب البيت
بينزل وبتنزل منه ايمان ومامتها وهما ماسكين مايا
دخلوا البيت بسرعة قبل ما حد يشوفهم
فؤاد بيفتح باب الشقة
مايا خايفة تدخل وماسكة ف ايمان
"ادخلى متخافيش محدش هيعملك حاجة"
مايا بتعيط وماسكة ف ايمان
فؤاد"متخافيش...لما تخفى هنبقى نتكلم"
مايا بتبص له بخوف وماسكة ف ايمان
الجدة"ادخلى يا مايا... محدش هيضربك"
ايمان"تطلعى تقعدى معايا"
مايا بتهز راسها وكأنها كانت مستنية الحل ده
ايمان"انا هاخدها عندى... هتقعد معايا لحد ما تبقى كويسة"
فؤاد باستسلام" طيب... حتى عندك احسن بعيد عن فارس وحياة وتوفيق"

حياة بتلم هدوم فارس وهى بتعيط وسامعة توفيق وفارس بيتكلموا
"كويس انك قدرت تمسك نفسك ومموتهاش"
فارس حزين ومش قادر يتكلم
"انا م الاول مكنتش عايز الجوازة دى... قلتلك بلاش مايا...كنت حاسس
انك مش هترتاح"
"عمر ما خطر على بالى انها ممكن تعمل كده... دى متربية قدام عنينا...ده
انت اللى مربيها تقريبا"
"العرق يمد...عايز ايه من واحدة امها اجنبية وعايشة بالطول والعرض..
.اقلب القدرة على فمها"
خرجت حياة من الاوضة
"خلاص لميت الهدوم"
توفيق"يالا بينا... وانا هتكلم مع فؤاد ان الطلاق يتم وتتنازل عن كل حقوقها...
مش كفاية الفضيحة"
حياة"راحت ولا جت بنتنا ... امانة عليكم بلاش فضايح وكفاية على قد كده...
استروها ومتحكوش حاجة لحد"
توفيق"والجيران اللى كانوا ف الفرح امبارح وهيلاقوهم النهاردة كل واحد ف بيت اهله"
حياة"هقعد مع اخواتى ونفكر ف اى حاجة نقولها ... ربنا امر بالستر ياخويا الله يسترك"
توفيق باستسلام لعشرة العمر مع اخوات حياة
"امرنا لله...يالا بينا"

ليست عذراء... الحلقة 4



ايمان بتفتح شقتها... بتدخل وهى ماسكة مايا
"تقعدى ف اوضتى ولا اوضة نسرين..تعالى ف اوضتى احسن"
مايا مستسلمة وماشية معاها
دخلوا اوضة... قعدتها على السرير
"نامى وارتاحى يا مايا"
مايا بتبص لايمان وتعيط
"متعيطيش... انا مش هلومك دلوقتى بس ده ميمنعش انى مش زعلانة منك... غلطتى يا مايا وغلطتك كبيرة اوى... وياخوفى يكون كلامهم صح ويكون حمزة"
يزيد عياط مايا ... عياط بحرقة
وتفتكر حمزة



فلاش باك
مايا قاعدة ع السلم لوحدها"12 سنة"
باب البيت مقفول... بتفتحه نسرين
بتقوم مايا تجرى عليها
"عملتى ايه ف الامتحان"
"الحمدلله...بدأنا الاجازة يامايا وخلاص مفيش مذاكرة"
"انا اول واحدة اخدت الاجازة بس محسيتش بيها علشان مخلصتوش"
"انتى قاعدة لوحدك كده ليه"
"نينة مش عايزانى اطلع العب بره...بتقولى عيب"
"ما احنا كبرنا يا مايا ومعدش ينفع نلعب بره"
"ماحمزة وفارس بيلعبوا وهما كبار"
"ماما وبابا قالوا البنات عيب تلعب ف الشارع"
"وبعدين هنعمل ايه ف الاجازة... حمزة وفارس هيلعبوا مع اصحابهم واحنا لأ"
"تعالى اطلعى اقعدى معايا ف البيت"



مايا ونسرين داخلين البيت
نسرين"مامااااااااا"
ايمان جاية من المطبخ
"ايه يانسرين عملتى ايه"
"الحمدلله كان سهل...هدخل انا ومايا نقعد جوه "
دخلوا اوضة نسرين... غيرت نسرين هدومها
"تيجى نتفرج ع التليفزيون ولا نفتح الكاسيت"
"عندك اغانى حلوة"
"عندى... تيجى نرقص"
"ياريت"
فتحت نسرين الكاسيت... ومسكت فرشاة الشعر عملتها مايك.. وعلت الصوت
"ويااااترى يا حبيبى ...ياترى
قريب ولااااا بعيييييد ولااااااا"
واندمجوا البنتين مع صوت بهاء سلطان وهما بيغنوا ويرقصوا



اتفتح الباب عليهم فجأة
"ايه الدوشة اللى انتوا عاملينها دى"
نسرين"ايه ياحمزة بنغنى"
حمزة بيقفل الكاسيت
نسرين"ايه الغتاتة دى"
حمزة"بذاكر يا نسرين...ازيك يامايا"
نسرين وهى خارجة من الاوضة
"ياماماااااااااا.. تعالى شوفى حمزة"
حمزة"معلش يامايا...انا عايز اذاكر والصوت شتتنى"
مايا"طيب...هاخد نسرين وننزل"
حمزة"انتى مسافرة امتى"
مايا"لما بابا ييجى هسافر معاه"
حمزة"بتحبى هنا اكتر ولا لندن"
مايا"هنا اكتر... هناك ببقى لوحدى مع بابا او ماما بس ببقى عايزة ارجع اقعد معاكم"
جت ايمان
"مزعل اختك ليه"
"مش عارف اذاكر"
نسرين"واحنا عايزين نرقص...هو لا يبقى لعب ف الشارع ولا نقعد براحتنا ف البيت"
ايمان بتفكر"ما تطلع تذاكر مع فارس"
حمزة"هو علمى وانا ادبى... وهو بيذاكر بطريقة وانا بطريقة"
ايمان ساكتة
"خلاص يابنات... انزلوا دلوقتى وانا هتصرف"



نسرين مع باباها ومايا ف سطح البيت
مصطفى بيعمل تندة ... وايمان بتفرش سجادة قديمة
وبتحط كراسى وترابيزة
ايمان"ايه رأيكم بقى... تقعدوا هنا براحتكم... تلعبوا ترقصوا تتنططوا براحتكم"
نسرين"فكرة حلوة اوى ياماما"
مصطفى وايمان بعد ما خلصوا نزلوا
ومسكت مايا ونسرين مجلات معاهم وقعدوا يتفرجوا
مايا"هو حمزة هيخلص امتى"
نسرين"هيخلص بكرة...وفارس هيخلص النهاردة"
"ما تيجى ننادى لحمزة يتفرج على القعدة الجديدة"
"طيب هنزل انادى لفارس وحمزة"



تنزل نسرين وتطلع ومعاها فارس وحمزة
يتفرجوا على مكانهم الجديد
حمزة كل ما يقوم ولا يقعد...مايا وراه
فارس كل ما ييجى يكلم مايا...يلاقيها منتبهه لحمزة بس
يزعل من اهتمامها الزايد بحمزة... وينزل يكمل مذاكرة




مايا لابسة.... وقاعدة جنب نسرين وكل شوية تبص ع الساعة
فؤاد قاعد جنب الشنط المتحضرة مستنى العربية اللى هتوديهم المطار
مايا بهمس لنسرين"هو حمزة اتأخر كده ليه"
نسرين"بيجيب النتيجة...ربنا يستر"
يسمعوا صوت الباب الخارجى بيتفتح ويتقفل
تجرى مايا ع الباب تستقبل حمزة
تفوجئ انه فارس
"ماما فين...انا نجحت"
مايا"وحمزة فين؟"
فارس بكسرة خاطر
"معرفش...انا هروح افرح ماما زمانها قلقانة"
نسرين"مبروك يافارس"
فارس"الله يبارك فيكى ...مطلعتش من حد تانى"
مايا"معلش يافارس...مبروك...اصل خايفة حمزة يتأخر ومشوفوش قبل ما اسافر"
حمزة يوصل البيت... تنزل مايا السلم وتقابله ع الباب
"عملت ايه ياحمزة طمنى"
"الحمدلله"
"مبروك... انا مسافرة كمان شوية"
بص فارس عليهم...وعلى اهتمام مايا بحمزة وعدم اهتمامها بيه... حس ان وجوده مالوش لازمة... وطلع




بعد سنتين
نسرين وحمزة وفارس قاعدين ف السطح
فارس ونسرين بيلعبوا كوتشينة
فارس"مش عايز تيجى تلعب برضه"
حمزة"مش عايز"
نسرين"سيبه ياعم ده بقى نكدى"
حمزة"هى مايا بتتأخر عند مامتها كتير كده ليه...كانت بتقعد اسبوع بقوا اتنين وتلاتة... مش كتير كده"
نسرين وهى بتلعب
"انت هتبص لها ف الكام يوم ف السنة اللى هتقعدهم مع مامتها... تلاقيها بتوحشها ياعينى"
حمزة"ماهى بتوحشنا احنا كمان"
نسرين وهى بتبص له وبعدين بتغمز لفارس
"مش ملاحظ ان حمزة بقى رقيق اوى"
فارس بيبتسم بمرارة وهو كل يوم بيتأكد من احساسه
ان حمزة بيحب مايا ومايا بتحبه



مايا راجعة من السفر مع فؤاد...ملهوفة على حمزة
بتوصل البيت... واول ما بتدخل عند جدتها وبتسلم عليها
"حمزة ونسرين وفارس فين؟"
"خرجوا"
"كده مش مستنيينى"
"ماهو انتم مقلتوش جايين امتى..دول هيتجننوا عليكى"
"هطلع اسلم على عماتى واستناهم فوق ف السطح"




مايا قاعدة ف السطح تستناهم... ملل وحنين واشتياق حاساه ناحيتهم كلهم... وبالاخص حمزة
يدخل حمزة اول واحد ويسلم عليها وهو بينهج
"حمدالله ع السلامة يامايا"
"الله يسلمك...مالك"
"مفيش اصل اول ما نينة قالت انك هنا طلعت السلم جرى...وحشتينى"
"وانت كمان وحشتنى اوى"
تدخل نسرين ووراها فارس ويسلموا عليها
يقعدوا كلهم مع بعض يتكلموا ومايا بتحكى عن اجازتها



يقوم حمزة يقف
"مايا... تعالى عايز اقولك حاجة"
قامت مايا ... وراحت معاه بعيد عن فارس ونسرين وف نفس الوقت على مرمى بصرهم
"نعم ياحمزة"
"متبقيش تتأخرى اوى كده تانى"
"متأخرتش ولا حاجة دول كلهم 3 اسابيع"
"كتير اوى يا مايا... انا مبقدرش استحمل يوم وانتى بعيد"
ابتسمت مايا بكسوف
"بصى انا مش عارف افضل ساكت اكتر من كده"
"تسكت على ايه"
"انا عارف انك لسه صغيرة على اللى هقوله"
"صغيرة ايه يا حمزة انا رايحة تانية ثانوى"
"برضه صغيرة.. بس بحبك من وانتى اصغر كمان"
فرحة مايا بكلام حمزة اللى كانت بتتمناه... خلاها طايرة من السعادة
"اتفاجئتى؟"
"لا... يعنى... اصل.. ما احنا كلنا بنحب بعض زى الاخوات"
"لا اخوات ايه... انا قدامى سنتين ف الجامعة تكونى انتى خلصتى ثانوى واكلم ماما وبابا ونتخطب رسمى"
مايا بفرحة الدنيا كلها
"انت بتتكلم بجد ياحمزة"
"اه طبعا... بس علشان خاطرى متغيبيش تانى عند مامتك... انا كنت هتجنن وحاسس انى لوحدى من غيرك"
"انا اللى كنت هموت وارجع بس بابا كان عنده شغل وانت عارف مش بيوافق يخلينى اروح او اجى لوحدى"



فارس ونسرين قاعدين مع بعض
فارس كل شوية يبص عليهم
نسرين"هما بيرغوا ف ايه كل ده"
قامت نسرين راحت لهم
"عيب اوى تفضلوا واقفين مع بعض وسايبيننا..هو فيه اسرار علينا"
حمزة"مفيش اسرار ولا حاجة"
فارس قام نازل
حمزة"رايح فين يافارس"
فارس"نازل البيت"
نسرين"استنى يافارس... مالكم شكلكم فيه حاجة مخبيينها علينا"
حمزة"لا طبعا مفيش حاجة تستخبى عليكم"
مايا وحمزة بيبتسموا لبعض... وكمل حمزة
"انا كنت بقول لمايا انى لما اخلص هخطبها "
نسرين بفرحة
"ايه ده ايه ده... ايه المفاجئات اللى من ورانا دى"
حمزة"من وراكم ايه بس... انا لسه قايلها حالا وقلت لكم على طول"
فارس"مبروك"
حمزة"اوعوا بس تقولوا لحد دلوقتى لحد ما اخلص...لو عرفوا هيخلونا منشوفش بعض ولا نقعد مع بعض...انتوا عارفين تفكير نينة صعب وخالو فؤاد وعمو توفيق...متزعلش يا فارس بس باباك لو عرف هيقول مينفعش اختلاط ونينة هتسمع كلامه"
فارس"متخافش...السر ف بير...انا نازل"



فارس طالع البيت... حزنه عميق ف قلبه
وغصب عنه عيونه مليانة دموع متحجرة مبتنزلش
بص على بيت جدته المفتوح
شاف فؤاد والجدة قاعدين...دور بعنيه على مايا بحركة لا ارادية
توفيق"يالا يا فارس... لاحسن يفتكروك عايز ترجعلها...مبقاش ينفع"
حياة"هدخل لماما"
توفيق"استنى علشان اجى معاكى نتكلم ف اجراءات الطلاق...اطلع انت"



طلع فارس بشنطة وحزنه وصدمته
وهو على السلم ومعدى من قدام شقة ايمان
شاف حمزة ومايا وهما خلال فترات حياتهم اللى فاتت
الطفولة والصبا وهما داخلين او خارجين او قاعدين ع السلم
نزلت دموعه لاول مرة من ساعة اللى حصل وصدمته
حس انه لوحده ومحدش شايفه



كمل السلم...وصل عند باب شقته...حط الشنطة جنب الباب
وكمل لحد السطح
دخل السطح... كل حاجة بقت اطلال
التندة مقطوعة من عوامل الزمن
الترابيزة مكسورة ومحطوطة على جنب
اصص الزرع اللى كان موجود... موجودة وفاضية


فلاش باك

مايا وحمزة بيبتسموا لبعض... وكمل حمزة
"انا كنت بقول لمايا انى لما اخلص هخطبها "
نسرين بفرحة
"ايه ده ايه ده... ايه المفاجئات اللى من ورانا دى"
حمزة"من وراكم ايه بس... انا لسه قايلها حالا وقلت لكم على طول"
فارس"مبروك"
حمزة"اوعوا بس تقولوا لحد دلوقتى لحد ما اخلص...لو عرفوا هيخلونا منشوفش بعض ولا نقعد مع بعض...انتوا عارفين تفكير نينة صعب وخالو فؤاد وعمو توفيق...متزعلش يا فارس بس باباك لو عرف هيقول مينفعش اختلاط ونينة هتسمع كلامه"
فارس"متخافش...السر ف بير...انا نازل"



نزل فارس...بسرعة قبل ما حد ياخد باله انه اتضايق
دخل شقتهم... ودخل على اوضته وقفل على نفسه
"ايه اللى مضايقنى كده... ما انا كنت حاسس من الاول اهتمامها بيه هو مش بيا... مش ذنبنهم انى حبيتها وسكتت... حمزة اخويا ولازم افرح لهم... مش لازم حد فيهم يحس بحاجة...ولا لازم حد من الكبار يعرف علشان مايا وحمزة ميزعلوش منى... والحمدلله ان الدراسة قربت وهركز ف المذاكرة وابعد عنهم شوية"




فارس قاعد بيذاكر ف اوضته...يخبط عليه الباب
"ادخل"
تدخل نسرين
"ازيك يافارس"
"الحمدلله...عاملة ايه"
"انا كويسة... انت اللى فين مبتطلعش تقعد معانا فوق ليه"
"انتى عارفة انى عندى مذاكرة كتير"
"ما كلنا عندنا مذاكرة"
فارس بيضحك علشان يدارى احساسه
"ايه جاب دراسة الهندسة للحاجات السهلة بتاعتكم دى"
"سهلة... ما مايا ثانوية عامة...مش هتبقى اصعب منها"
"لا يا ستى انا اصعب...وبعدين انا عايز اركز واذاكر كويس علشان اجيب تقدير واتعين ف الكلية"
"الله الله ده احنا راسمين على تقيل اوى"
"اوى اوى"
ضحكوا مع بعض... وسألته نسرين بتبرة جدية
"فارس...انت بجد كويس ولا زعلان من حد فينا"
"زعلان...لا طبعا هزعل ليه"
"معرفش...حسيت كده انك اخدت جنب بقالك فترة فحبيت اطمن عليك"
"ربنا يخليكى يا نسرين...طول عمرك اخت جدعة"
"احنا كلنا منستغناش عن بعض... متبقاش تغيب علينا...ابقى حتى اطلع اقعد معانا كل خميس"
"حاضر"
"يالا اسيبك علشان معطلكش"



فارس واقف وبيفتكر ايامهم الحلوة قبل ما تتبدل حياتهم
رغم انها كانت ايام صعبة عليه الا انها مكنتش اصعب من اللى فيه دلوقتى
بص لاطلال المكان اللى بيجمعهم
"اكيد اللى حصل كان هنا... كده ياحمزة تعمل كده... لو كنت حبيتها زى ما انا حبيتها مكنتش تضرها بالطريقة دى... انا ليه بعد ده كله مش عارف اكرهكم"
احساسه انه متضايق منهم من اللى عملوه...واحساسه انه بيفتكر ايامهم الحلوة وعدم قدرته على كرههم... تعبه اكتر
وخرج بسرعة من السطح...وكأنه بيهرب من ذكرياته وخيالاته اللى بتطارده

قصة جميلة لكن لاتصلح الا للشرقيين ومن هم يعيشون فى هذا الجزء من العالم
لايرقوني تعذيب اى انسان لان حرية الجسد من الحريات الشخصية وفى اى مكان متحضر العذرية ليس لها اى معنى سوى ان البنت غير مرغوب فيها او مصابة بالبرود

ايام عمري
رائعه هي قصتك الجميله
ما ننحرم من روائعك الجذابه
بانتظار الحلقه الخامسه
تحياتي
العاشق حمام من القلب
22/1/2015