مدونة قصص دينا عماد

ليست عذراء... الحلقة 7

فرحت نسرين ان مايا اتكلمت
"الحمدلله انك اتكلمتى... احكى لى يامايا... ايه اللى حصل؟؟
ومين اللى عمل كده...جاسر؟؟"
فى نفس اللحظة اللى دخلت فيها ايمان وسمعت الجملة الاخيرة
ايمان باستغراب
"مين جاسر؟؟"
بصت مايا وايمان لبعض
ايمان"وانا اللى فاكرة انى اعرف عنكم كل حاجة...مين جاسر يا مايا؟
مين جاسر يا نسرين"
مايا بلسان تقيل
"هحكيلك يا عمتى... هحكيلكم كل حاجة حصلت من بعد موت حمزة"
قعدت ايمان تسمع الحكاية...وسرحت مايا بخيالها

فلاش باك
مايا ونسرين وفارس وحياة وتوفيق ومصطفى والجدة كلهم قاعدين مع
بعض ف بيت الجدة
الستات لابسين اسود وقاعدين كلهم بيتكلموا ويضحكوا
صوت مايا
"بعد موت حمزة كنا بنقرب كلنا لبعض اكتر... كنا زى مانكون بنخفف عن بعض
الحزن اللى دخل حياتنا فجأة... كل ده كان اول 3 شهور بس... انما بعد كده"

مايا ونسرين راجعين من الجامعة وداخلين البيت
مايا بتدخل بيت الجدة... نسرين بتطلع بيتها
فارس بيرجع من الجامعة ومايا قاعدة بتتغدا والباب مفتوح
يشاور لها ويطلع بيته
صوت مايا
"لما الدراسة بدأت ... كل واحد فينا بقى عنده اللى يشغله... بقينا نشوف
بعض بالصدفة او لما نروح نسأل على بعض...فارس كانت اخر سنة ليه
ف الكلية وطبعا زى كل السنين اللى فاتت كان مهتم بدراسته اكتر من
اى حاجة تانية وبالتالى مامته وباباه علشان ميسيبهوش كانوا بينزلوا قليل
اوى ... انا ونسرين كل واحدة فينا ف كلية مختلفة وسنة مختلفة وبالتالى
عندنا اللى يشغلنا عن بعض
وعدت اول سنة بعد موت حمزة وبدأنا نتعود على غيابه... لحد ما رجعنا
للصفر من تانى"

ايمان قاعدة ف اوضة حمزة... لابسة الاسود ورابطة راسها بايشارب اسود...
عينيها باين عليها العياط الكتير
الباب مقفول عليها
مامتها بتخبط وهى مبتفتحش
نسرين بتعيط ف حضن مايا...ومايا كمان بتعيط
صوت مايا
"لما عمو مصطفى مات فجأة... اتصدمنا كلنا... وكأن موته رجع حزننا من اول
وجديد ورجع جو الحزن من تانى ... وبقينا حاسين ان كل حاجة اتغيرت.. اسعد
بيت ف العيلة بقى اتعس بيت بعد ما مات 2 فيه... وبالتالى بقي الحزن
جوانا على اللى ماتوا واللى لسه عايشين... ومع الوقت... بقينا نحاول
نتعلق بأى فرحة علشان نخرج من الحزن اللى احنا فيه... وكانت اول فرحة"

فارس داخل بيت الجدة...وراح لخالته ايمان ووشوشها
وسط كل الموجودين... قامت ايمان حضنته بفرحة
صوت مايا
"اول فرحة كانت لما جه فارس واول واحدة قالها على خبر نجاحه بتقدير
عالى هو انتى ياعمتى... واتمسكنا بالفرحة دى وبقينا كلنا نفكر ف فارس
وهيتعين ف الكلية ولا لأ وهيعمل ايه لو متعينش... كنا بنشغل نفسنا
علشان منفكرش ف الحزن اللى تعبنا منه"

ايمان ونسرين قاعدين بيسمعوا باقى الحكاية
سكتت مايا تشرب وترتاح من الكلام
ايمان"كل ده مقلتيش مين جاسر"
نسرين"جاسر كان فتى الجامعة الاول...حاجة كده زى فتى احلام كل بنت"
ايمان"وايه علاقة مايا بيه"
نسرين"ماهى مايا كمان لما دخلت الجامعة...كانت فتاة احلام كل شاب...
كانوا البنات مبيحبوش يكلموها ولا يمشوا معاها علشان بيحسوا انها اجمل
منهم ولو مشيوا معاها هيبان الفرق بينهم ف الجمال...وكل الشباب بيتمنوا
يكلموها ويتعرفوا عليها"
ايمان"وهى؟؟ مكنش ليها صحاب"
نسرين"كل ما تتصاحب على بنات...تدريجيا كده يبعدوا لسبب اللى قلتهولك
ده...فبقينا نتقابل ف الجامعة بين محاضراتنا وبنروح ونيجى مع بعض فمكنش
لمايا اصحاب غيرى"

مايا بدأت تكمل
"وبدأت مأساتى بعد ما اتخرجت نسرين... جاسر زى ما قالت نسرين كان حلم
كل بنت ف الجامعة ومع ذلك عمرى ما اعجبت بيه ولا اهتميت وكده...كان
شعلة نشاط والجامعة كلها تعرفه وتحبه...يعرف ناس من كل كلية..
.موظفين الجامعة اصحابه...دكاترة الجامعة يعرفوه ... هو كان اكبر منى لانه كان
بيعيد وبياخد السنة ف اتنين...ولحظى اتقابلنا ف سنة تالتة وكان دفعتى"
فلاش باك
مايا ف المحاضرة... وجاسر قاعد ف الصف اللى قدامها على اليمين شوية...
كل شوية يلتفت ويبص لها

صوت مايا

"كان بيحضر كل المحاضرات اللى بحضرها...ويقعد ف مكان يخليه يقدر
يشوفنى...ملاحقته ليا بالنظرات لفتت نظرى"

مايا رايحة المحاضرة...وقبل الباب بخطوات ترجع وتقرر متحضرش
وتشوف جاسر واقف ع الباب ولما يشوفها رجعت يخرج من القاعة
صوت مايا
"شغلنى اذا كان بيحضر علشانى ولا صدفة...وف يوم قررت محضرش واشوف
هيعمل ايه...لقيته خرج ومحضرش هو كمان"

مايا بتكمل الحكاية وايمان ونسرين قاعدين
ايمان"هااا وبعدين"
مايا"قعدنا ع الحال ده الترم الاول من تالتة"
ايمان"وبعدين ايه اللى حصل"
مايا"لا قبل وبعدين...لازم احكى لك عن حال البيت ايامها"
ايمان بتحاول تفتكر
"كان ايه الحال"
مايا"وقتها فارس جاله شغل السعودية وسافر...ونسرين اتخطبت وانشغلت شوية"
نسرين"انا انشغلت عنك يامايا؟"
مايا"انا مش بلومك يانسرين.. بس انتى وقتها كنتى مثلا بتخرجى مع ممدوح
لما ييجى... بتكلميه ف التليفون... بييجى يزورك هو واهله..كده يعنى بقى
ليكى اهتمامات تانية غصب عنك"
ايمان"كملى وبعدين"
مايا"ساعتها زاد احساسى اوى بالوحدة... اخواتى اللى كانوا بيهونوا
عليا حياتى مبقوش موجودين... صحبتنا ولمتنا اختفت... احساس الوحدة
ده وحش اوى "
ايمان"كل ده انتى وجاسر متكلمتوش"
مايا" لا اتكلمنا ف اخر يوم امتحان الترم الاول من سنة تالتة"

فلاش باك
مايا خارجة من الامتحان قرب عليها جاسر
توقعت زى كل مرة انهم هيتبادلوا النظرات
واتفاجئت بيه بيكلمها
"خرجتى بدرى ليه"
"خلصت"
"وعملتى ايه حليتى كويس"
"الحمدلله"
"ماتيجى نشرب حاجة ف اى مكان"
"لا شكرا...بعد اذنك"

مشيت مايا خطوات
"مايااا"
سبقها ووقف قدامها
"نعم"
"احنا اخر يوم امتحانات النهاردة"
"ما انا عارفة"
"يعنى مش هشوفك طول الاجازة"
وارتبكت مايا ومعرفتش ترد
"بصى لو مش عايزة نقعد مع بعض هاتى رقمك ابقى اكلمك"
لحظات سكوت وتردد
"مش عايزة تجيبى رقم تليفونك ليه...احنا مش زملا"

مايا بتكمل الحكاية
"واتكلمنا ف الاجازة... ولقيت الاهتمام اللى مفتقداه والحب اللى اى بنت
تتمناه... من اول مكالمة فهمته انى لا بخرج لوحدى ولا انا بتاعة مقابلات
وخروجات والكلام ده... مطلبش منى فعلا اننا نتقابل...كنا مكتفيين بالتليفون...
حسيت اننا مع بعض لحظة بلحظة صارحنى بحبه لقيت نفسى بقوله وانا كمان...
وحكيت له عن حمزة وانا خايفة انه يغير او يتغير معايا"
ايمان"وبعدين؟؟"
مايا"قالى ان احساسى ناحية حمزة كان طبيعى وخصوصا انى كنت صغيرة
وكان هو قريب منى اوى علشان كده حسيت بالحب...وان سنى الصغير
هيخلينى انسى الحب ده بسرعة... كلامه اقنعنى جدا وده اللى خلانى
اعرف اعيش بعد كده من غير ما احس بتأنيب ضمير ناحية حمزة...حتى
لما حبيت فارس كنت بفتكر كلام جاسر واقول ان مشاعرى ناحية حمزة
كانت حب مراهقة وده اللى اكدتهولى نسرين بعد كده وانتى
كمان ياعمتى"
نسرين"لما مايا جت تحكيلى عن علاقتها بجاسر بعد ماحكت له عن
حمزة...شجعتها"
ايمان"مقولتوليش ليه"

مايا"خفت تزعلى ياعمتى...واكدت على نسرين انها متقولش"
ايمان"كملى وبعدين"
مايا"عشنا الترم التانى وسنة رابعة ف سعادة واجمل قصة حب بيتضرب
بيها المثل... كل يوم مع بعض ف الكلية... وانا ف البيت بيكلمنى طول الوقت"
ايمان"وايه اللى حصل"
مايا"بعد ما اتخرجت كان هو لسه هيدخل سنة رابعة لاول مرة يعنى
ياعالم هيخلص امتى"
ايمان"نسيت اسألك...هو كان ايه ظروف عيلته يعنى واحد كل ده ف الجامعة
اهله بيصرفوا عليه ولا بيشتغل ولا ايه"
ابتسمت مايا بمرارة
"من غبائى انى مسألتش نفسى السؤال ده دول الفترة اللى
كنا فيها مع بعض"
ايمان"ليه؟؟ ليه بتقولى من غبائى"
مايا"سميها غباء..سميها قلة خبرة ...المهم ان القفلة اللى كنتم قافلينها
عليا دى خلتنى مش بفهم الناس"
ايمان"مش فاهمة"
مايا"هحكيلك"

فلاش باك
مايا بتتكلم ف التليفون مع جاسر ف التليفون
"جاسر بابا جاى الاسبوع الجاى وهيقعد اسبوعين وبعدين نسافر لندن"
"هتوحشينى يا حبيبتى"
"وانت كمان اكيد هتوحشنى.... بس انت ناوى تكلم بابا امتى"
"اكلم بابا اقوله ايه"
"قوله انك عايز تخطبنى"
"هو انا لسه خلصت كلية"
"يعنى ايه"
"يعنى مينفعش"

"ازاى مينفعش...قوله وتعالى اخطبنى وبعدين نبقى نتجوز بعدين لما تخلص"
"يا بنتى انتى مش عايشة ف الدنيا... هو فيه خطوبة من غير شبكة
وشقة وتجهيز جواز"
"مش مستعجلين نبقى نعمل كل ده على مهلنا...مش هنفضل كده طول
الوقت مستخبيين واللى بيننا تليفونات وبس"
"ما انتى اللى مش عايزة تخرجى معايا ولا اشوفك خالص"
"ايوه...اخاف حد يشوفنا وعلشان كده بقولك تعالى اتقدملى"
"ظروفى متسمحش دلوقتى"
"متسمحش ليه"
"معييش فلوس"
"اسلفك"
"لا"
"ليه...ماهى مش اول مرة"
"انت بتعايرينى انك بتسلفينى"
"والله ما اقصد...انا اقصد بس انى ممكن اسلفك حق الدبل وهقنع بابا واعمل
كل حاجة تسهل اننا نتخطب"
"لما تبقى تفهمى الكلام وتعرفى تتكلمى كويس هبقى ارد عليكى"
واتقفلت السكة ف وش مايا وهى بتتكلم ومش مصدقة طريقته

مايا سكتت وايمان ونسرين قاعدين
ايمان"هو انتى كنتى بتديله فلوس؟"
مايا"اه... مع انه مكنش بيطلب بصراحة...كان مثلا يقولى محتاج اجيب كذا
وخلصت مصروفى...يقولى فلوسى اتسرقت...حاجات من دى...بس ساعات
كنت الاقيه بيصرف كتير اوى"
ايمان"منين كل ده"
مايا"معرفش ... طريقة صرفه كانت مريبة ومفكرتش فيها الا بعد ما سبنا بعض"
ايمان"وسبتوا بعض امتى؟"
مايا"من وقت المكالمة اللى حكيت لك عليها"
ايمان"حتتة مكالمة عادية كده تسيبوا بعض بسببها"

مايا"اتصلت كتير بعدها مبقاش يرد عليا... وبطلت اتصل احتراما لنفسى وعلشان
مقللش من نفسى اكتر من كده"
ايمان"وبعدين"
مايا"وقتها كانت نسرين قربت تتجوز فبقيت اشغل نفسى معاكم ف جهازها
وفرش البيت وكل ده...وبجد دى اكتر فترة حسيت فيها انى مشغولة ومش
متضايقة...كنت فرحانة اوى لنسرين ومكنتش اعرف اللى مستخبى
لى بعدها"
نسرين"ايه اللى حصل بعدها...انا من ساعة ما اتجوزت وانا حسيت اننا مبقناش
قريبين لبعض زى الاول"
مايا"علشان بعيد وكنتى بتيجى زيارات متباعدة فاكيد مش هنبقى زى الاول"
ايمان"يعنى يا مايا مش جاسر اللى عمل كده؟"
مايا"لا.. انا مشفتش جاسر بعد المكالمة اللى قلتلك عليها"
ايمان"اومال ايه اللى جاب سيرة جاسر"
مايا"انا بحكى لك علشان تعرفى كل حاجة مريت بيها حتى مشاعرى
بحكيها دلوقتى "
ايمان"يعنى ضعفتى بعد كده"
عيطت مايا

"متظلمنيش ياعمتى زى ما كل الناس ظلمتنى"
ايمان"طب كملى ايه اللى حصل"
مايا"انا تعبت من الكلام... ممكن اخد الدوا وارتاح شوية ونبقى نكمل"
نسرين"كفاية عليها كده ياماما... احنا هنروح من بعض فين... تستريح
شوية وترجع تحكى لنا"

هههههههههههه يآآآآه دا شكلو مسلسل تركي
بدنا نخلص اوام اوام و نعرف مين هو

يلا سالي خليها تشد حيلها

ال اوام اوام

مهو مسلسل فعلا تركي ومن اجزاء كتيررررر

ههههههههه

يلا نشوف جزء جديد وحلقة جديدة

ليست عذراء... الحلقة 8

خرجت ايمان ونسرين من الاوضة بعد ما سابوا مايا
"كل ده حصل وانا مش عارفة حاجة... كلام مايا حسسنى انى قصرت معاها اوى"
"ليه ياماما... انتى كنتى هتعملى ايه بس...وليه بتحملى نفسك فوق طاقتك...
مش انتى المسئولة عنها لوحدك"
"انا من يوم ما جت وقلت بينى وبين نفسى انى هكون مكان امها...
اه ماما وحياة مقصروش معاها بس انا حسيتها مسئولة منى"
"وانتى قصرتى ف ايه بس"
"انى مكنتش حاسة بيها"

رن موبايل نسرين
"ده ممدوح"
وردت عليه
"الو...ازيك يا ممدوح...كويسة الحمدلله...انت هتبات عند مامتك ولا ف البيت...
ابقى اقفل محبس المياه قبل ما تنزل... لا انا عند ماما"
وارتبكت وهى بتتكلم وبصت لايمان
"مايا...لا لسه مروحتش لمايا... هبقى اسلملك عليهم ان شاءالله... مع السلامة"
قفلت مع ممدوح ...سألتها ايمان
"ايه اللى جاب سيرة مايا"
"بيسأل عليها هى وفارس فاكرنى روحت لهم"
"كويس انك رديتى كده...يوه كنت هنسى"
"ايه؟"
"لازم انزل اعرف فؤاد ان مايا اتكلمت...هيفرح اوى"
"وهتحكى له؟"
"مش عارفة...انتى ايه رأيك"
"مش عارفة"
"انا هقوله اللى حصل انها اتكلمت بس لسه منعرفش حاجة"
"ماشى"
"هتنزلى معايا"

ايمان داخلة بيت مامتها... لقيت فؤاد قاعد
دخلت قعدت
"ماما فين؟"
"نامت من شوية...اخبار مايا ايه"
"اتكلمت الحمدلله"
فؤاد بفرحة
"بجد؟؟ وحكت ايه اللى حصل ومين اللى عمل كده"
"لسه يا فؤاد... هى قعدت تتكلم معانا شوية لحد ما تعبت...بكرة ان شاءالله
نبقى نعرف"
"الحمدلله انها اتكلمت... زعلانة منى؟"
"مجبتش سيرة والله...بس يعنى اللى مرت بيه مش سهل برضه"
"وانا؟؟ الصدمة اللى اتصدمتها مش سهلة ابدا"

فؤاد ومامته بيخبطوا على باب ايمان الصبح
فتحت لهم نسرين
فؤاد"صباح الخير يانسرين"
الجدة"صحيتوا ولا لسه نايمين"
نسرين"صباح النور ياخالو... صحينا يا نينة"
دخلوا وقعدوا وسألها فؤاد
"مايا فين"
"ف الحمام وماما بتعمل الفطار"
جت ايمان تسلم عليهم
وخرجت مايا م الحمام...شافت باباها
راحت حضنته وهى بتعيط
وبتتكلم احسن من اليوم السابق
"انا اسفة يابابا انى حطيتك ف الموقف ده... انا غلطانة"
فؤاد وهو بيحاول يتحكم ف دموعه وحزنه
"ليه يامايا عملتى فينا كده"
"والله ما عملت حاجة... كل غلطتى انى سكت كل ده"

كلهم منتبهين لكل كلمة بتقولها مايا
ايمان"احكى لنا يامايا ... قصدك ايه"
قعدت مايا جنب باباها
مايا"هحكى لكم بس اوعدونى كلكم وعد مش عايزة غيره مهما كان رأيكم
فيا او لومكم عليا"
نسرين"وعد ايه"
مايا وهى بتمسح دموعها وبنبرة تحدى
"فارس ومامته وباباه ميعرفوش حاجة من اللى هقولها دى"
بصوا كلهم لبعض...ردت مايا
"زى ما اتهمنى الاول قبل ما يسمعنى ...وحكم عليا انى مذنبة... مش لازم
يعرف انى بريئة ومليش ذنب"
فؤاد"طب احكى"
مايا"وعد محدش يقولهم حاجة"
ردوا كلهم
"حاضر...نوعدك"

فلاش باك
فرح نسرين وممدوح وكلهم موجودين ماعدا فارس

صوت مايا
"الفترة اللى بعد ما سبت جاسر كانت قليلة اوى وانشغلت فيها ...ونسرين
اتجوزت وسافرت مع بابا لندن"

فؤاد وهو بيسأل
"مين جاسر"
ايمان بتلحقها "زميلها من الجامعة وكان عايز يتقدم لها بس ظروفه مكنتش مناسبة"
فؤاد"وايه علاقته باللى حصل"
مايا بتكمل"علاقته غير مباشرة لانه أثر فيا اوى"

فلاش باك
مايا قاعدة لوحدها ف بيت مامتها
بتقلب ف التليفزيون بملل ...بتمسك المجلات الموجودة بملل اكتر
صوت مايا
"روحت عند ماما... والمرة دى كنت رايحة وبفكر انى اقعد عندها شوية زيادة
بما ان مبقاش ورايا دراسة وفاضية...بس انشغالها اكتر الوقت ووجودى لوحدى
خلانى مستنية اليوم اللى ارجع فيه مصر تانى... مكنتش اعرف انها اخر
مرة هشوف ماما"

مايا قاعدة ف بيت جدتها... بتتكلم ف التليفون ودموعها نازلة
صوت مايا
"وبعد ما بابا جه وصلنى ورجع لندن تانى... اتصل بيا وقالى على وفاة ماما...
واتفاجئت انى كنت بحبها اوى وموتها اثر فيا اكتر ما كنت اتخيل او بمعنى اصح
مكنتش فكرت ف الموقف ده قبل كده"

مايا قاعدة ف اوضتها بتعيط... جنبها جدتها بتطبطب عليها
وعلامات السهر والارق على وشها
صوت مايا
"ورجع موتها يجر عليا الاحزان من اول وجديد... كل اللى بحبهم بيبعدوا عنى
واحد ورا التانى... عيلتنا اتفرقت... قاعدة ف البيت على طول ومعنديش اصحاب
حتى اتكلم معاهم"

مايا قاعدة بتحكى وكلهم منتبهين
"اسوأ فترة عشتها ف حياتى كانت بعد وفاة ماما اللى جه بعد جواز نسرين
بشوية... تخيلوا قاعدة طول الليل والنهار افتكر الاوقات القليلة اللى قضيتها
مع ماما ...والاوقات القليلة اللى قضيتها مع حمزة واعيط..حسيت انى مش مكتوب
لى افرح... حياتى فاضية محدش معايا...نسرين اتجوزت وفارس مسافر ودول
الوحيدين اللى كان ممكن اخرج معاهم لو عايزة اتفسح... مفيش حد مهتم
بيا...اه نينة وعماتى بيهتموا بأكلت...نمت... عايزة حاجة نفسى فيها...انما
برضه احساس الوحدة صعب... بقيت احن اوى لاهتمام جاسر بيا ومكالماته
واتصالاته...فكرت كتير انى اكلمه تانى... ترددت اوى... وبعدين اتصلت بيه...
قفل وبعتلى مسدج مختصرة...متتصليش بيا تانى... جرحنى ومفكرتش حتى
انى اسأله ليه... بس حالتى زادت سوء...عياط على طول... مفيش نوم ..
.مليش نفس آكل... وطبعا كانوا نينة وعماتى حاسين"
الجدة"ايوه فعلا... انا كنت بتقطع عليكى... وقلت مش معقول موت امها اللى
مقعدتش معاها يعمل فيها كده"

ايمان"انا ايامها كنت بسافر لنسرين كتير لما عرفت انها حامل"
مايا"فاكرة بقى ياعمتى لما نسرين اجهضت وروحتى قعدتى معاها شهر...
وقتها حصلت المصيبة"
وانتبهوا كلهم
"ايه اللى حصل"
فلاش باك
مايا فى اوضتها قاعدة لوحدها كالعادة
حياة قاعدة مع مامتها بره
"ماما هى مايا لسه على حالها برضه"
"لسه يا حياة"
"البت دى محسودة...على جمالها ده ومحدش اتقدم لها خالص واهى
داخلة على 22 سنة"
"معاكى حق صحيح"
"ولا تكون ياماما حد عملها حاجة"
"حد مين...هى عمرها اذت حد علشان حد يأذيها"
"الناس الوحشة كتير...نضمن منين"
"ونعمل ايه"
"معرفش انا بقولك يمكن يكون ده السبب"

الجدة بتتكلم بعد ما افتكرت اللى حصل
"اه صحيح... وطلعت حياة معاها حق"
فؤاد"معاها حق ازاى؟"
الجدة"قعدت اسأل الجيران والمعارف على حد كويس بيفهم ف فك السحر
علشان يشوف البت معمولها عمل بصحيح ولا لأ... ودلونى ع الشيخ خضر"
مايا بتمسح دموعها بسرعة علشان تقدر تكمل الحكاية
فؤاد بضيق"وده اسمه كلام ياماما تصدقى التخاريف دى"
الجدة"تخاريف ؟؟!! متقولش كده...بنتك كان معمولها عمل صحيح وربنا
جاب الشفا على ايده"
مايا بوجع"جالى الشقا كله على ايده"
وانتبهوا لها باستغراب

فلاش باك
الجدة وحياة قاعدين
"لا ياماما مش هقدر اجى معاكى...توفيق لو عرف حاجة زى كده تبقى مصيبة"
"وهو مين بس اللى هيقوله"
"وانا بعد العمر ده كله هخرج من وراه ومن غير ما اقول رايحة فين"
"وانتى خارجة مع حد غريب...مش مع امك"
"لا ياماما ...مش عايزة مشاكل...عايزة تاخديها وتروحى روحى"

مايا وجدتها قاعدين ف انتريه قديم وناس تانية قاعدين
وفيه واحدة ست ف الاربعينات بعباية سودة بتدخل وتخرج من عند الشيخ
وتنظم مواعيده ومقابلاته
صوت مايا
"روحنا للشيخ خضر... البيت من اول ما دخلته وانا قلبى اتقبض... الست
اللى زى سكرتيرة او مساعدته دى مريبة... نظراتها وضحكتها تخوف... وكلامها
ف موضوعات غريبة... ومبتسألش اى حد عن سبب زيارته زى
ما بنشوف ف الافلام"

مايا وجدتها داخلين اوضة الشيخ وفيها
ترابيزة صغير وقاعد وراها الشيخ و4 كراسى
محطوطين كل كرسيين جنب بعض
وكرسى تانى ف اخر الاوضة لوحده وضهره يبقى للناس
صوت مايا
"دخلنا للشيخ خضر...راجل ف الخمسينات ... اتقبضت منه اكتر من قبضتى
من الست اللى شفتها بره...قعدت جنب نينة ع الكرسى اللى لازم فيها
وانا ماسكة ف دراعها وخايفة اسيبها...قعدت تحكى له وقال انه لازم يرقينى
الاول...وقالى اقعد على الكرسى اللى ف اخر الاوضة"

مايا قاعدة على الكرسى ف اخر الاوضة....ضهرها لجدتها
والشيخ حاطط ايده على راسها وبيقرا كلام مش مسموع
صوت مايا
"نظرات الشيخ ليا كانت غريبة... مرعبة... حيوانية... لما قال هيرقينى خفت
يلمسنى بحجة الرقية... بس ساعتها حط ايده على راسى وهو بيقرا لحد
ما خلص وقالى قومى وراح قعد مكانه"

الشيخ قاعد على كرسيه...ومايا وجدتها قصاده
"بنتك يا حاجة مش معمول لها عمل ولا حاجة...دى محسودة من عين
مصلتش ع النبى"
"يا خبر... منهم لله اللى بيحسدوا الناس...وبعدين؟"
" كل اللى اقدر اعملهولها انى احصنها ...وده هيحتاج جلستين تلاتة يمكن اكتر"
"ازاى الجلسات دى"
"ده شغلى بقى يا حاجة... وعلشان تعرفى انى مش نصاب ولا دجال انا قلتلك
الحقيقة ...كان ممكن اقولك معمولها عمل وعايز يتفك انما انا جيت معاكى صريح"
"ربنا يكرمك يا شيخ خضر... ده انت صيتك سابقك"

مايا قاعدة بتحكى
"ورجعنا قولت لنينة بلاش نروح تانى وانى مرتاحتش للناس دول وشكلهم
نصابين...مسمعتش كلامى وقالت انى مش فاهمة حاجة وصممت اننا
نروح معاد الجلسة اللى حددها"

مايا داخلة مع جدتها اوضة الشيخ
بيتكلم معاهم الشيخ...وتقوم الجدة تخرج من الاوضة
مايا بتقوم تقعد على الكرسى ف اخر الاوضة
صوت مايا
"روحنا معاد الجلسة ونفس احساسى متغيرش...خايفة من الناس دول
ومش عارفة ليه... اتكلم الشيخ مع نينة وقالها الجلسة لازم اكون لوحدى..
.وخرجت فعلا...وبعدها قالى اقعد على الكرسى اللى ف اخر الاوضة"

مايا بتفتح عينيها ف سرير ف اوضة مفيهاش غير السرير وشماعة وكرسى
متغطية وهدومها جنبها على الكرسى
والشيخ واقف بيكمل لبسه من ع الشماعة
كلم مايا وخرج من باب ف الاوضة
صوت مايا بنشيج عالى
"بعد ما خرجت نينة من من الاوضة وورحت قعدت ف المكان بتاع المرة اللى
فاتت ..فوقت لقيت نفسى ف سرير...معرفش نيمنى امتى وازاى...كل اللى
فهمته انى خلاص مستقبلى ضاع واتدمرت... كان واقف ع باب الاوضة وبيهددنى...
بصوت بشع وشكل ابشع
- لو اتكلمتى هتلاقى cd باللى حصل ف كل حتة ومستنيكى الجلسة الجاية"

يخرب بيت المشعوذين

القصه صارت اروووووووع

موفقه ايام عمرى

اكيد يا شهد وبصراحة القصة صايرة كتيرر منها اكيد

للاسف انه لسا في ناس كتير بتأمن بلسحر والشعوذة

بلرغم من اختبارات كتير ناس قدامها

نورتيني شهد ويلا نتابع حلقة جديدة مع بطلتنا مايا

ليست عذراء... الحلقة 9

مايا بتفتح عينيها ف سرير ف اوضة مفيهاش غير السرير وشماعة وكرسى
متغطية وهدومها جنبها على الكرسى
والشيخ واقف بيكمل لبسه من ع الشماعة
كلم مايا وخرج من باب ف الاوضة

صوت مايا بنشيج عالى
"بعد ما خرجت نينة من الاوضة وورحت قعدت ف المكان بتاع المرة اللى فاتت ..
فوقت لقيت نفسى ف سرير...معرفش نيمنى امتى وازاى...كل اللى فهمته
انى خلاص مستقبلى ضاع واتدمرت... كان واقف ع باب الاوضة وبيهددنى...
بصوت بشع وشكل ابشع
- لو اتكلمتى هتلاقى cd باللى حصل ف كل حتة ومستنيكى الجلسة الجاية"
انهارت مايا وهى بتفتكر...محاولاتها التماسك علشان تكمل باءت كلها
بالفشل...كل الموجودين بيعيطوا حتى فؤاد
الجدة بتعيط وبتخبط على رجليها وهى قاعدة وكأنها بتضرب نفسها
"يا حبيبتى يا بنتى... قطيعة تقطعنى انا السبب"
ايمان اخدة مايا ف حضنها بتحاول تخفف عنها
نسرين بتعيط بصوت عالى...فؤاد دموعه نازلة بصمت
ايمان"اهدى ياماما... السكر هيعلى عليكى"
الجدة"انا اللى اخدتها ووديتها... مقلتيش ليه ...مقلتليش ليه يامايا... حرام
عليكى تعملى فينا كده"
مايا"قلتلك مش عايزة اروح تانى... كنتى مقتنعة بيه ومش راضية تسمعينى"
الجدة بتعيط مش عارفة ترد... فكرت لحظات
"بس انتى خفيتى لما روحنا له"
فؤاد بتماسك
"كملى يامايا...لما قالك مستنيكى الجلسة الجاية...روحتى؟"
مايا بتمسح دموعها ...وكانت نسرين قامت جابت لها مياه

شربت مياه وبدأت تهدا وتكمل
"لما خرجت من الاوضة طلع الباب بيودينى على الاوضة بتاعة الشيخ اللى
كنا فيها ... قعدت ونادى على الست اللى عنده دى وقالها تدخل نينة...
دخلت نينة وقالها انه خلص الجلسة والجلسة الجاية بعد اسبوع ولازم
اكمل الجلسات كلها... رد فعلى وقتها انى كنت ساكتة خالص مش بتكلم...
مش قادرة ولا ليا نفس اتكلم ولا ارد...وطول الطريق واحنا راجعين نينة تكلمنى
وانا مبردش عليها كل اللى بفكر فيه انى مش هروح له تانى ...
لحد ما جينا البيت"

فلاش باك
الجدة بتفتح باب البيت م بره
بتشوف شقتها مفتوحة
صوت مايا
"دخلنا البيت كانت عمتى حياة وعمو توفيق قاعدين مستنيينا
واول ما دخلنا عمتى حياة لحقتنا بالكلام"
حياة"ايه ياماما اتأخرتوا ليه؟؟؟كل ده بتشوفى بلوزة لمايا"
الجدة"ملقيناش حاجة عجبتنا ...انتوا قاعدين مستنيينا ليه"
توفيق"اصل فؤاد بعت الحوالة وكنت جايبهالك"
الجدة بتاخد منه الفلوس"شكرا"
مايا داخلة اوضتها
توفيق"مايا استنى"
وقفت مايا
توفيق"لبسك عامل كده ليه"
بصت مايا برعب على هدومها وهى بتلمها
توفيق"مش قلنا بلاش لبس البناطيل دى"
الجدة"ماله البنطلون يا توفيق...ما البنات كلها بتلبس كده"
توفيق"بنات مش مظبوطة وعايزة تلتفت النظر"
مايا واقفة ...شافت الكلام بقى بينهم انسحبت ودخلت اوضتها

مايا بتعيط وبتحكى
"دخلت وقفلت على نفسى وانا مش عارفة اتصرف ولا اتكلم... نينة بتاخدنى
هناك من غير ما تقول علشان عمتى حياة خايفة من عمو توفيق... عمتى
ايمان عند نسرين... نينة مقتنعة بالشيخ ومصدقاه...ومفيش حد ممكن
احكيله ويسمعنى...وغير كل ده اتكسفت اقول ولا اتكلم... مكنتش عايزة
حد يقول عليا حاجة وحشة... بقى كل تفكيرى ازاى ده ميتكررش تانى"
كلهم بيعيطوا... وفؤاد بيسألها بترجى
"وعملتى ايه؟"
"قلت ف نفسى هو ميعرفش بيتنا ولا تليفوننا ولا حاجة غير اسمى...
يعنى مش ممكن ييجى مثلا او يبعت لنا حد يهددنا... ده كان كل اللى
بفكر فيه وقلت لازم ابين انى بقيت كويسة علشان نينة متودنيش تانى..
. وفعلا بقيت اقعد واتكلم وامثل انى مبسوطة وانا بتقطع ولما نينة تنام
ادخل اقفل على نفسى وافضل اعيط لحد ما انام...حتى لما بنام كنت احلم
بالراجل البشع ده واقوم من النوم مرعوبة"

ايمان"ليه سكتى...ليه يامايا متكلمتيش"
مايا"هقول ايه ولمين... مفيش حد جنبى اقوله حاجة زى دى...خوفت"
فؤاد"والزفت ده انا مش هسكت له"
مايا"ارجوك يابابا بلاش فضايح...كفاية اوى لحد كده ... انا مش هستحمل
حد تانى يعرف واتفضح...كفاية اللى انا فيه"
ايمان"فارس لازم يعرف يمكن يرُدِك والحكاية تتلم"
صرخت فيها مايا
"اوعى ياعمتى حد يقوله...اوعوا حد يقوله... مين قال انى عايزة ارجع له بعد
اللى عمله فيا...اوعوا حد يقوله"
عيطت مايا بهيستريا...حضنتها ايمان
"خلاص مش هقول حاجة ...خلاص اهدى"

فارس لابس ورايح ع الباب
توفيق"رايح فين؟"
فارس"نازل شوية"
توفيق"لو حد سألك من الشارع هتقول ايه"
فارس"اى حد يابابا..مش هفضل محبوس ف البيت...اتخنقت"
حياة"امانة عليك يافارس ماتقول حاجة لحد... انت تطلقها من سكات...علشان
خاطر خالك يا خويا"
فارس"متقلقيش ياماما... مش هفضح نفسى"
توفيق"اوعى تطلقها من نفسك كده"
فارس"مش فاهم"
توفيق"لو طلقتها غيابى هتبقى عايزة منك كل حقوقها لو رفعت قضية وطالبت بيهم"
حياة"واحنا برضه هندخل بعض المحاكم"
فارس"اطمن يابابا ...مالهاش عين تطالب بحاجة"
توفيق"اسمع الكلام انت بس...انت مش عارف حاجة... لازم تتنازل عن كل
حاجة واجيبلك اللى صرفته كمان"
فارس باستسلام"ماشى ...انا نازل"

فؤاد قاعد مع مامته هو سرحان وهى قاعدة تتفرج على التليفزيون
"ماما"
"نعم"
"هو الراجل النصاب ده عنوانه ايه"
الام بفزع"وانت عايز عنوانه ليه؟"
فؤاد"عايز اروح له"
الام"تروح له تعمل ايه...متوديش نفسك ف داهية يابنى ولا تفضح بنتك"
فؤاد"متخافيش ...مش هعمل حاجة...بس عايز اروح له ع الاقل ابلغ عنه بسبب
النصب والدجل"

نسرين بتحضر شنطتها ومايا معاها ف الاوضة
"عايزة اقعد معاكى اكتر من كده بس ممدوح عمال يزن عليا ارجع ومش
عارفة اقوله ايه"
"ارجعى يا حبيبتى لبيتك ربنا يسعدك"
"مايا.. اوعى تزعلى انى بعدت عنك"
"ازعل ايه بس... انتى بعدتى بمزاجك...دى سنة الحياة وانا خلاص هبقى كويسة"
"قوليلى صحيح"
"نعم"
"ليه مقلتيش لفارس قبل الجواز"
"خفت"
"ومخفتيش انك تتحطى ف الموقف اللى اتحطيتى فيه ده"
"متخيلتش ان فارس اللى متربى معايا وعارفنى كويس اوى ممكن يشك فيا...
ومع ذلك فكرت كتير انى اقوله... قبل الخطوبة وخلال الخطوبة وكنت كل مرة
أأجل الكلام على اخر لحظة"
"ليه"

"الكلام كان بيقف يانسرين ومبقدرش اطلعه ابدا...لحد ما حددنا الفرح...
فضلت الاسبوع الاخرانى ده مبنمش ومش عارفة هقوله ازاى...
وقلت لازم اقوله قبل كتب الكتاب...بس يوم الفرح وقبل كتب الكتاب مكنش
فيه وقت ولقيت نفسى معاه وانا مش عارفة اتكلم"
"ماهى اكيد مكنتش حاجة سهلة عليه يا مايا"
"يعنى كل اللى شفته ده ومريت بيه كان سهل عليا... يا نسرين انا مفرحتش
ابدا...الفرحة ف حياتى قليلة اوى"
"معلش ربنا يعوضك خير... لو فيه اى حاجة كلمينى... متخبيش عليا
حاجة تانى"
"حاضر"



اخدت نسرين شنطتها...اخدتها منها مايا
"هاتى انتى مش قادرة تشيلى"
"شكرا يامايا...ماما سبقتنا على تحت؟؟"
"اه نزلت...بابا هيوصلك تركبى وابقى طمنينا عليكى لما توصلى"
"حاضر... خليكى مع ماما يامايا
"لا كفاية كده...انا هرجع اقعد تحت مع نينة تانى"

نسرين بتسلم على جدتها ومامتها
الجدة"سلمتى على خالتك؟"
نسرين بتبص لمايا ...خايفة تزعلها
الجدة"زى ما مايا بنت خالك وزعلانة عليها...مينفعش تقاطعى خالتك وابن خالتك"
نسرين"حاضر يا نينة هطلع لها"

نسرين بتسلم على حياة وتوفيق وفارس
بتسلم بسرعة علشان محدش يسألها على حاجة
فارس عينيه كلها اسئلة ومش عارف يسأل
توفيق"انتى حاجزة يا نسرين؟"
نسرين"لا ياعمو"
توفيق"طب انا نازل معاكى علشان عايز خالك"

مايا قاعدة مع فؤاد وايمان وجدتها
مستنيين نسرين تنزل ...نزلت نسرين ومعاها توفيق
اول ما شاف مايا بص لها باحتقار
قامت مايا دخلت اوضتها ودخلت وراها نسرين
توفيق"السلام عليكم"
ردوا كلهم السلام بعد ما لاحظوا نظرته لمايا
توفيق"عايز اتكلم معاك كلمتين"
فؤاد"خير"
قعدوا وايمان والجدة معاهم
توفيق"عايزين نروح للمأذون ونخلص وتيجى تبريه"
فؤاد"ونروح ليه...مايطلقها وخلاص... مش عايزها تحضر"
توفيق وهو بيبص لفؤاد باحتقار انه ساكت على عار بنته وخايف عليها
"لا لازم تيجى تبريه عند المأذون.... وانت كنت قلت هتدفع المصاريف اللى دفعها...
متآخذنيش ابنى صرف اللى وراه واللى قدامه على انها جوازة العمر...بس عملة
بنتك بقى منها لله"
شخط فيه فؤاد
"خلاااااص يا توفيق...اللى عايزه هياخده من سكات"

مايا قاعدة ف الاوضة وسامعة كل كلمة بيقولها توفيق
كلامه بيجرح فيها... دموعها نازلة ف صمت
ولما حست ان توفيق بيعاير باباها
مسحت دموعها وخرجت م الاوضة... ونسرين بتشدها علشان متخرجش
مايا على باب الاوضة...بتتصنع القوة
"بابا... اى وقت عايزنى نروح للمأذون انا جاهزة"
ايمان والجدة ساكتين مرغمين...وبيتابعوا الموقف
توفيق بضحكة سخرية وهو خارج
"صحيح ياما تحت الساهى دواهى"
فؤاد"النهاردة بالليل نروح للمأذون"
توفيق"خليها تجيب الشبكة وانت حضر 20 الف جنيه حق الفرح... علشان
نعمل بيهم فرح يليق بعروسة بنت بنوت"
خرج من البيت وكلهم بيبصوا لبعض ومتغاظين منه
التفت فؤاد لمايا



"متزعليش... انا أجلت سفرى بسبب الظروف دى... ايه رأيك ترجعى تعيشى
معايا بعيد خالص عن هنا"
مايا "اعيش هناك؟؟ مبحبش هناك خالص يابابا...يمكن لو كانت ماما عايشة
كنت جيت وقعدت شوية معاك وشوية معاها"
نسرين"ما تجربى تروحى شوية تغيرى جو وتهدى اعصابك ولو ارتاحتى اقعدى
مرتاحتيش ارجعى"
مايا بتفكير"هفكر"
فؤاد"يالا احنا يانسرين"

فؤاد نازل من تاكسى ف منطقة شعبية
بيبص حواليه...شاف قهوة
راح قعد عليها
القهوجى بيبص على فؤاد
راح وشوش صاحب القهوة بشك
شاور له صاحب القهوة انه يروح
راح لفؤاد
"اؤمر يا باشا"
"شاى لو سمحت"
"تحت امر سعادتك"
"بقولك ايه"
"اؤمرنى"
"هو الشيخ خضر فى انهى بيت هنا؟؟"

ياريت يبلغ عنه او يقتله

يسلمووووووووو ايام عمرى

الله يسلمك حبيبتي

هههههههههههه شهد

هنشوف شو رح يصير مع هلدجال

اكيد بحلقة اليوم

تابعوني

ليست عذراء... الحلقة 10

فؤاد نازل من تاكسى ف منطقة شعبية
بيبص حواليه...شاف قهوة
راح قعد عليها
القهوجى بيبص على فؤاد
راح وشوش صاحب القهوة بشك
شاور له صاحب القهوة انه يروح له

راح لفؤاد

"اؤمر يا باشا"
"شاى لو سمحت"
"تحت امر سعادتك"
"بقولك ايه"
"اؤمرنى"
"هو الشيخ خضر فى انهى بيت هنا؟؟"
وطلع فؤاد 50 جنيه من جيبه ناولهم للقهوجى
اخدهم القهوجى ف جيبه بسرعة وهو بيستغرب
"الشيخ خضر !!!"
"ايوه...الشيخ خضر... مالك مستغرب ليه"
"هو سعادتك جاى له ليه؟"
"عندى مشكلة كده وعايزُه فيها وناس دلونى عليه"
"بس اكيد الناس دول مجوش من زمان"
"من سنتين تقريبا"
"الشيخ اتقتل السنة اللى فاتت"
"اتقتل؟!"...مين اللى قتله"
"واحد وسلم نفسه ومحدش يعرف ليه"
"والقاتل ده مقالش قتله ليه"
"اللى بسمعه من الناس انه مقالش سبب"
ونادى واحد من الموجودين على القهوجى
"تؤمرنى لحاجة تانية سعادتك"
"شكرا"

فؤاد داخل على مايا اوضتها
"بتعملى ايه؟"
"مفيش"
قعد على طرف السرير قصادها
"انا مكنتش هسكت على حقك...انا اه مكنتش هبلغ عن الاغتصاب زى ما طلبتى بس كنت هبلغ عنه كنصاب ودجال"
مايا ساكتة بتسمع
"روحت وسألت عليه...عرفت انه اتقتل"
ظهرت الراحة والفرحة والشماتة على وش مايا
"يستاهل"
"اكيد يستاهل...واضح يا مايا انك مكنتيش لوحدك ضحيته"
"ده حيوان بشع"
"اللى يعمل كده طبعا حيوان واهو اخد جزاؤه ولسه جزاؤه عند ربنا"
"ربنا ينتقم منه"
طبطب على ايديها وهو بيكمل
"انا بقول نقول لفارس النهاردة اللى حصل"
ردت باصرار
"لأ"



"ليه بس... انتى عايزة تفضلى ف نظر توفيق يعنى.."
"ارجوك يابابا ... مش عايزاه يعرف علشان ميفتكرنيش بلتمس اعذار ولا بستدر عطفه... يابابا شوف الفرق بينك وبينه...انت ضربتنى اه بس سمعتنى بعدها... حسيت بحنيتك عليا وخوفك عليا... فارس شك فيا على طول وخوفى وارتباكى فسره بمزاجه هو وصدق تفسيره...انا شفت معاه ليلة من اسوأ ايام حياتى...ده فضل يضرب فيا كام مرة وبقسوة... ولما نمت م التعب والوجع اللى انا فيه صحانى يضربنى... فارس مبقاش فارق معايا ولا هو ولا عمو توفيق"
"فكرتى كويس يعنى"




"مفيهاش تفكير...انا اللى عايزة اتطلق منه ...انا كنت مرعوبة منه مكنتش فاكرة ان فارس ممكن يبقى بالقسوة دى... ده انا حسيت ان ربنا بعتهولى بعد اللى حصل لى ده علشان يكون جنبى...انت متعرفش كان بيقول لى ايه يابابا عن سعادته وحبه ليا... كل ده راح ف لحظة ... فارس المتعلم مفكرش للحظة انى ممكن اكون طبيعية واتهمنى ...فارس خلاص بره حساباتى... وانا مستعدة للطلاق"

ف بيت الجدة... المأذون موجود وقاعد معاه فؤاد
ايمان والجدة مع مايا ف الاوضة
الجدة"يا بنتى انا غلبت معاكى ليه مش عايزانى اقولهم... كفاية انى السبب"
مايا"يا نينة كفاية الله يخليكى... خلاص مش عايزة افكر ف اللى فات...ساعدونى انسى"
ايمان"خلاص ياماما سيبيها براحتها"
الجدة"مكنتيش عِندية كده"
قامت الجدة وخرجت من الاوضة

راحت لفؤاد
"هما فين"
"كلمتهم وزمانهم نازلين"
دقايق ودخلت حياة وتوفيق وفارس
قعدوا بعد ما القوا التحية
توفيق بيبص لفؤاد
فؤاد حط قدامه ظرف الفلوس
المأذون"نبتدى الاجراءات...فين الزوجة"
قامت الجدة نادت على ايمان ومايا
جت مايا ...ماشية جنب ايمان وبتتجنب النظر لفارس
فارس لما شاف مايا... مقدرش يمع عينه م انه يتابعها لحد ما قعدت جنب فؤاد

المأذون بيتكلم
فارس بيبص لمايا بعتاب ولوم وحزن
مايا بتبص ف لاشئ وهى متماسكة وبتحاول تشغل تفكيرها بعيد تماما عن الموقف علشان متتأثرش
خلص المأذون اجراءاته ف اتمام الطلاق
ناولها الدفتر تمضى...مضت وقامت بسرعة على اوضتها
قامت ايمان وراها
فارس مضى ف الدفتر...لم المأذون اوراقه وقام
قام فارس بخطوات تقيلة من الحزن
قامت حياة وتوفيق
الموقف صعب على كل الموجودين
وفَضلوا كلهم الصمت

ايمان مع مايا ف الاوضة
مايا بتعيط ف حضن ايمان
"ما انتى اللى صممتى يا مايا"
"مش ندمانة... انا مدبوحة"

فارس ع السلم
"انا نازل"
توفيق"رايح فين... الحمدلله انك خلصت منها"
حياة"متزعلش نفسك يافارس ربنا يعوضك خير"
فارس مردش ونزل خرج من البيت خالص

فارس خرج...وفضل ماشى وهو سرحان وبيفكر
"ايه الصلابة اللى كنتى فيها دى يا مايا... ازاى كلهم ساكتين عليكى كده وكأنى انا المُلام... بيداروا علشان حمزة...طول عمرهم بيحبوه ... الله يسامحك يامايا... وجعتى قلبى وكسرتى فرحتى ... نفسى اكرهك مش قادر"

فؤاد مع مايا والجدة بيتغدوا
فؤاد"مايا هتعملى ايه؟؟ هتيجى معايا...انا لازم اسافر علشان شغلى"
مايا"لا يابابا ...مش عايزة اسافر...انا معرفش حد هناك على الاقل انا هنا مع نينة وعمتو ايمان...هناك صعب اوى"
فؤاد"طيب مش عايزة حاجة قبل ما اسافر"
مايا"شكرا"
فؤاد"مش عايزة تشتغلى... لو عايزة انا موافق"
مايا"بجد يابابا... يعنى ممكن توافق انى اشتغل"
فؤاد"ايوه...انتى كبرتى ولازم تواجهى الدنيا"
الجدة"وايه لازمة الشغل بس"
فؤاد"وليه لأ"
الجدة"احنا ناقصين ...اللى ما اشتغلت وهى بنت هتشتغل وهى متطلقة"
مايا بابتسامة تصنع اللامبالاة
"يعنى القفلة عليا حمتنى !!"

مايا بتتكلم ف الموبايل
"ازيك يا عمتو... منزلتيش ليه النهاردة... انا مستنياكى... لا انزلى انتى... مش عايزة اطلع يكون حد م فوق نازل ولا حاجة... لا مفيش جديد ...ما تيجى نخرج شوية طيب... بقالى شهر وزيادة مخرجتش واتنخقت اوى من البيت... بجد...طيب هلبس لحد ماتنزلى"

ايمان لابسة وقاعدة مع مامتها
"ماتيجى معانا ياماما"
"هتروحى فين الساعة دى"
"اهو نروح اى حتة نشم هوا"
"لا انا مش قادرة...متتأخروش بالليل"
خرجت مايا من اوضتها
"انا جاهزة ياعمتو"
الجدة"ابقى افتحى الباب بالمفتاح انا داخلة انام"

خرجوا ايمان ومايا... وهما بيقفلوا الباب الخارجى
نزل فارس من تاكسى قدام البيت
ايمان"وقفه يا فارس والنبى"
فارس للتاكسى"ثوانى لو سمحت"
قرب فارس عليهم...وهو بيبص لمايا
"ازيك يا خالتى"
وقبل ما ترد عليه...سبقتها مايا وركبت التاكسى وهى متجاهلاه تماما
ايمان بترد على فارس
"ازيك يا فارس...سأله عليك يا حبيبى حياة قالت لى انك بقيت بتقعد ف الشغل اوفر تايم وبتيجى متأخر"
"الله يخليكى ياخالتى... اعمل ايه مبقاش ورايا غير شغلى يمكن ينسينى اللى حصل"
حاولت تتجاهل تلميحه
"طيب هروح انا علشان منوقفش الراجل اكتر من كده"
وسألها بعفوية
"رايحين فين"
"خارجين شوية كده...مع السلامة"
وقف فارس وايمان بتركب... وهو بيتابع التاكسى لحد ما مشيوا

فارس ف اوضته... دخل له باباه
"عايزك ف كلمتين يا فارس"
"اتفضل يابابا"
"انت مش هتشوف حالك بقى"
"اشوف حالى ازاى"
"تشوف عروسة بنت حلال وتخطبها وتتجوز...انت شقتك جاهزة من مجاميعه"
"لا مبفكرش ف الجواز"
"يعنى ايه مبتفكرش...حتى لو مبتفكرش ..فكر"
"لا مش عايز اتجوز"
"انت هتخلى واحدة منحلة تعقدك... انت الف واحدة تتمناك"
"على الاقل مش دلوقتى يا بابا"
"لا انت لازم تتجوز... لازم البت اللى تحت دى تعرف غلطتها وتندم عمرها كله على اللى عملته"
وف محاولة للانهاء الكلام بهدوء
"ربنا يسهل يابابا...لما ابقى الاقى واحدة مناسبة"

الجدة داخلة بشوربة اوضة مايا
ايمان قاعدة جنبها ع السرير
الجدة"انتوا اكلتوا ايه بره عمل ف البت كده"
ايمان"اتعشينا بس"
الجدة"ادى اكل بره...البت مبتثبتش حاجة ف معدتها... تلاقى الاكل بايظ"
ايمان"ما انا اكلت معاها محصليش حاجة"
قامت مايا راحت ع الحمام
الجدة"نجيب لها دكتور ولا ايه"
ايمان" انا اديتها دوا كده يهدى معدتها شوية... لو معملش حاجة نوديها لدكتور"
رن موبايل ايمان
"الو... ازيك يا حبيبتى"
رجعت مايا م الحمام قعدت ف السرير تانى وعليها اثر الهبوط
ايمان بتكمل كلامها مع نسرين
"وبعدين قالك ايه؟؟ ما تيجى انتى يا نسرين... طيب هشوف واكلمك...قولتيله على طلاقهم.. طيب كويس ...مع السلامة"
الجدة"خير مالها"
ايمان"كانت عند الدكتور وبيقولها احتمال كبير يولدها ف الاسبوع الاولانى من التاسع"
الجدة"ليه"
ايمان"ضغطها بيعلى والدكتور خايف يسيبها"
الجدة"هى هتولد فين هنا ولا هناك"
ايمان"الدكتور اللى متابعة معاه هناك وعايزانى اروح لها"




الجدة"اه طبعا روحى لبنتك ماتسيبيهاش... هى قالت لجوزها ايه على مايا"
ايمان"قالت اتخانقوا وف لحظة شيطان رمى عليها يمين الطلاق"
ايمان بتبص لمايا
"هتيجى معايا... ولا مش عايزة تكونى اول من يشيل ابن نسرين"
مايا"هاجى ان شاءالله بس اخف م اللى انا فيه"

فى المستشفى...وقدام اوضة العمليات
ممدوح ومايا وايمان قاعدين مستنيين
خرجت الممرضة بالمولود وادته لايمان
"مبروك"
مايا"وهى؟"
الممرضة"شوية وهتخرج"
ايمان بتبص للمولود وبتوريه لممدوح
راحت مايا تبص عليه... ناولتهولها ايمان
مسكته وقربته منها تبوسه
"ماشاءالله جميل اوى"
وفجأة حست مايا بدوخة
ايمان شافتها وهى بتدوخ...مسكت المولود بسرعة
ايمان"الحقنى يا ممدوح"

مايا بتفتح عيينها وهى ف سرير ف المستشفى
ايمان"خضيتينى عليكى"
ممدوح بضحك"يعنى اول ما تمسكى ابنى كنتى هتوقعيه كده"
مايا"حصل له حاجة"
ايمان"لا يا حبيبتى انا مسكته منك على طول"
ممدوح"انا هروح اقف عند العمليات...سلامتك يا مايا"
مايا بتقوم"روحى يا عمتى اطمنى على نسرين"
ايمان"خليكى... خلى البيبى جنبك هروح ابص عليها واجى"
دخلت ممرضة"سلامتك...دراعك لو سمحتى"
مايا"ليه"
ايمان"الممرضة اللى فوقتك كتر خيرها قالت لازم عمل تحاليل ونشوف سبب الاغماءة"

ف اوضة المستشفى
نسرين على السرير قاعدة وممدوح جنبها
مايا قاعدة على السرير التانى ...وايمان على طرف السرير والمولود ف حجرها
دخلت الممرضة
"نتيجة التحاليل طلعت يا مدام... واضح انك هتشرفينا قريب"
ايمان بعدم فهم
"خير؟"
الممرضة"خير ... الاغماء كان من الحمل...مبروك"