تحدي موضوع المليون رد

عدّت قُصادُه الذكرى ف الصُورة
بعد أما ضاع الأصل منه زمان ..
لِسَّه الصور براويزها مكسورة
لِسَّه الأصول ماضي كأنه ماكان ..
..
لو كان فاكرها / تِفتِكر فاكراه ؟
طب لو ناسيها
ليه صورتها معاه ؟
..
دا الماضي وادي وهو إيه ودّاه
..
لفّت عقارب ساعتُه كام ساعة
مرّت عقارب شَعرُه للخمسين ..
عدّت سلاحف حِلمُه شمّاعة
نطّت أرانب باقي عُمرُه سنين ..
..
مُعظم حكاوي الدنيا متباعة
واللي إشترى حكاوينا ناس تانيين ..
..
إيه الحكاية ؟
و برواية مين ؟
..
كان لسه فاضل ع المعاد ساعتين
محتار مابين قميصين جُداد ..
يا هل ترى هتحب ده ؟
هتحب ده ؟
هتحبني ؟
فات المعاد ..
...
كان لسه فاضل في المخبي بعاد ..
..
عدّت قصاد الذكرى مِيت صورة
عدّى قصاد الصورة حِلْم مجاش ..
عدّى ف طريقها
بس ما شافتهوش ..
عدّت قُصاده
بس ماعِرفهاش .....