الحرية

الحريِّة -------
---------------
قبل الحريِّة ..
كِنَّا ننام بالبَرِّية
وبَعد الحرِّية .. ...
صرنا مِتل وحوش البَرِّية
قبل الحرية
كِنَّا غَيارى و نَشميِّة
وبَعد الحريِّة
صرنا شَبِّيحَة و بَلطَجية
قبل الحُرِّيَة
كِنَّا نحط الورد بالمَزهَريِّة
وبَعد الحُرِّيَة
صار الدَّم أحلى هديِّة
يا هاالحُرِّية
مَزَجوا فيكِ أسرار العبوديِّة
وباعوا واشتَروا فيكِ وبالقَضيِّة
يا حُريِّة
نادوا لِكْ حَتَّى تحييهُمْ
صار العَكس وبإيدِكْ مَوَّتيهُمْ
غَلب اليَأس الأفكار الثوريِّة
جوَّاتْ الْحَبس انكَسرِتْ
المَزهَرية
وأصوات النَّاس
تنادي لِكْ يا حُريِّة
شربنا الكاس
من قلب العَصفوريِّة
بَدَلْ المَليون
صفَّينا ألف و ميِّة
بسجن الكون
سَجَنونا مع ألف تَحيِّة
ضاعِتْ الأرض
وخسرنا الإنسانية
دَقِّتْ الحَرْب
أبواب المدَنيِّة
نسينا الحُبّ
وفنينَا البَشَريِّة
كرمال الرَّبّ
شي نَفحة آدَميِّة
جوَّاتْ القلب
آهات دَمَويِّة
وَيلو هالشعب
من الجهل و الأُميِّة
ضَيَّع الدَّرب
إسلام و مسيحية
بدعي لِلرَّب
يهدينا سُنَّى و علويِّة
ننسى اللي فات
ونعتبرُه مات
بالحَرب الغَجَريِّة
هَيدي البلاد
خلقِتْ للإنسانية
ونحنا أحفاد
الحضارة الوجدانية
ونحمُلْ رُفاة
الكره والتَبَعيِّة
ونسقي هالأرض
مَحَبِّة للأبَديِّة ..