كلمتين لمصر

كل عين تعشق حليوة و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِآمن يمشي فين


شابة يا أم الشعر ليلي
و الجبين شق النهار
و العيون بحرين أماني
و الخدود عسل و نار
و اللوالي ( اللؤلؤ) بابتسامتك
يحكوا أسرار المحار
يللي ساكنة القصر عالي
إيمتى يهنالي المزار
كلميني يا صبية
طال علي َّ الانتظار
كلمتين يا مصر يمكن
هما أخر كلمتين
حد ضامن يمشي آمن
أو مِآمن يمشي فين


قصرك المسحور غيلانو
أغبى من دود الغيطان
بعد مص الغصن الاخضر
ينحتوا عضم العيدان

و اللي خلى الارض خضرا
و اللي خلى الدار آمان
عاش بجور ملو جوفه
مات بخوفه من الغيلان
طوّع الغلبان

ما قالش عن شقا العمر اللي كان
كلمتين بمصر يبقوا
هما أخر كلمتين
حد ضامن يمشي آمن
أو مِآمن يمشي فين


أدي كلمة من عذابي قلتهالك
باقي كلمة
من حنيني صنتهالك

في الضلوع من دنيا ظالمة
كنت خايف يلمحوها
يقتلوها في سكة ضلمة

شقشقت و النور بشاير
يا نسيم الشوق يا طاير
خد لمصر الصبح كلمة

طول ما يبقى الركب ساير
بالبصاير و العينين
يبقى ضامن يمشي آمن
يبقى عارف يمشي فين


للشاعر احمد فؤاد نجم
تحيااااااااااااااااتى
عمــــــــــــــــــده

نقل رائع عماد
حفظ الله مصر
وشعب مصر
دمت بووووود